Ut Motto vur 't seizoen 2018 - 2019 is:  
''Sjitterend

   

2009 Chris de irste (Kurvers)

16 november 2009 12:03:06
Daags nao de resepsie in Egchel stong alwer de leedjesaovend op ut programma. Um 8 oor zien we mit de raod beijeingekome in de brookhazekoeht. Vief versjillende groepe heije zig op gegaeve um deil te neme aan dit geweldige leedjesgebeure. Zoeas gebroekelik deij ikzelf auk wer meij, zelfs 2 kier, dus pfff, wat un umkleije. Mer wel leuk!!! Natuurlik woort de leedjesaovend geopend door de winnaars van veurig jaor: Beijeingerapt. Ut waar wer un sjoen optreije van de dames, mit alwer un knallend slot! Daonao waar ut de beurt aan de 5 groepe um eure neije leedjes en zangkwaliteite te laote huure. Ik mot zegge det ut allemaol erg leuke liedjes ware en het veur de jury dus auk erg moeilik zuuj waere. Toen de irste ronde waar geweest waar het tied veur de tombola, mit as hoofdpries un vaat beer. Ut waar erg druk in de koeht dus dr ware auk erg veul lutjes verkocht. Toen de prieze einmaol dr oeht ware, kos de twidde ronde eindelik beginne. Door versjillende oorzake zien de optreijes deze ronde altied wat losser dan in de irste ronde en det woort auk good overgenome door de minse in de zaal. Nao de twidde ronde heet de jury zig truukgetrokke en waar der tied veur un erg sjoen gastoptreje, wao we mit de ganse raod nog oppe buhne mosse danse. Daonao waar ut tied veur de priesoehtreiking. Naodet de dames van hagel & slaag al mit de presentatiepries ware gaon striek, waar ut de beurt aan Krangs-um um finaal totaal de buhne op te kome um eure derde pries in ontvangst te neme. De twidde plaats waar dit jaor wer veur Tren en de Men en op det moment steeg de spanning in de zaal. Toen vorst William de winnaar, namelik Hagel & Slaag bekend makte zoog ik tog allemaol tevreije gezichte. Unne zeer terechte winnaar!!! Natuurlik mochte de dames eur liedje nog unne kier ten gehure brenge en daonao hebbe we dr nog un groet fiest van gemakt det tot in de vroege uurtjes doorging. Beij deze wil ik trouwes nog alle deilnemers bedanke veur eur deelname aan deze geweldige leedjesaovend! En ik hoop det we mit veul minse Hagel & Slaag kinne gaon aanmoedige op het P&M leedjesfestival. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
16 november 2009 11:41:05
Nao un mandelange stilte, is dan eindelik ut neije vastelaovendseizoen aangebroke. Nao woensdig nao de 11e van de 11e in Maastreech te zien geweest, stong vriedig de resepsie van 4x11 in Egchel op ut programma. Dus det betekeinde eindelik wer uns aantreje mit de Brookhaze. Um half 9 kwame we beij Grommen beijein um vervolgens mit de bus nao Egchel te reizen. Dao aangekome, zuuse tog wer veul bekende gezichte diese de aafgelaupe mande wat minder hees gezeen. Naodet we de Kemphaze onger aanvoering van prins Jack heije gefeliciteerd, hebbe we os in de zaal begaeve. Toen de resepsie waas aafgelaupe zien we irst mit alle prinse beij elkaar aan ut buffet gaon staon en hebbe we ff beijgepraot, wat erg gezellig waar. Toen kwaam dr un band optreje (ik weit de naam zoe neet mier) en toen hebbe we mer op de denkbeeldige dansvloer plaatsgenome. Versjillende nummers van onger angere Rowwen Heze kwame veurbeij, dus in plaats van polonaises, stong deze aovend veural springe op ut programma. Um 1 oor kreeg ik alwer ut bericht det de bus dr wer waar. Einmaol truuk in ut Brookhazeriek, hebbe we nog effe beij grommen de gezellige aovend aafgeslote. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
25 fibberwarie 2009 13:56:05
En dan is ut alwir dinsdig, de litste daag van de vastelaovend. De daag begos 's merges um elf oohr mèt un aetentje van Ron en mich veur alle minse van de carnavalsvereining en de kammereuj. Ich sjat det der zo'n 70 man waare um te aete, daarum zien wae auch in de kantine van de voetbalclub gaon zitte. Mien kooktante hej echt un hiël lekker buffet veur os gemakt. Toen wae heje gegaete bin ich nog effe nao hoës gegaon, want wae moste 's middigs um kwart euver twieje wèr bej Gromme verzamele. Dao haet de raod zich in unne kiël gehaese en zien wae mèt ut boorebroedspaar en onger begeleiding van de hofkapel door Kunningslus getrokke richting de brookhazekoeht. Dao woorte Siem en Linda in ut onecht mèt elkaar verbonge, mer veurdet ut zowiët waas heje ze irst nog ein prachtig stukske in gestudeerd. Daonao waas de resepsie en hebbe alle minse ut boorbroedpaar en de familie gefelisiteerd. Toen de resepsietaofels einmaol aan de kangk waare geschove, barstte ut fiëst wèr los en woorte der wèr versjillende polonaises ingezat. Um 8 oohr kwaame ze mich hale en toen hebbe wae os mèt de raod effe truuk getrokke, um vief minute later wèr nao binne te trekke um te beginne mèt de aafsloehting. Wat is det tch un specijaal moment asse dao veur ut litst bove op de bühn steis en desse zuus det de hiële koeht vol mèt minse steit. Vorst William begos de aafsloehting mèt ut bedanke van alle minse die mèt heje geholpe der zonne geslaagde vastelaovend van te make. Auch os aojers woorte nao bove gehald um ein ongersjeiïng in ontvangst te neme. Net veurdet ich ut woord zuuj kriege, kwaam der toch nog un verassing. De leeje van de VCD heije alwir wat veur bereid en unne biemer en laptop woorte te veurschien gehald. Ut bleek det ze un foto-alfabet heije gemakt, mèt allemaol foto's van Ron en mich der in. Ich kos de miste foto's mich neet ins miër herinnere, maar ich vong ut wel wir prachtig gemakt. Jonges en maedjes hiël erg bedankt daoveur. Toen kreeg ich toch echt de litste kiër de microfoon en ut is echt ongeluifelik wie det veult. Dao zien echt gin weurt veur det mosse eigelik zelf mèt gemakt hebbe. Ich heb dan auch probere te besjrieve wie ich de vastelaovend belaefd hej. Det ut echt un geweldig fiëst waar en det ut liekt alsof ut eine lange en hiële sjoëne daag is, mer dae toch wir veurbej is verdesse der erg in haes. Ich heb auch alle minse bedankt, te beginne mèt mien en Ron zien familie, natuurlik de dörpsgekke die euveral mèt nao toe zien gewaest, de carnavalsvereiniging mèt de raod van elf, ut bestuur en auch de dames van de raod. Die hebbe mich mèt daes daag allemaol fantastisch ongersteund. Speciaal dank aan Vorst William, dae alles perfect hej geregeld veur en mèt de vastelaovend. Auch heb ich nog prins Jeffrey, prinses Renee, hofdame Charley, de hofkapel, de Dj's Antonio en Blowie, de dansmarietjes en de showdansgroepe bedankt veur eur bejdrages aan deze geweldige vastelaovend. En natuurlik auch idderein dae in de neje koeht hej geholpe um der zon geweldig fiëst van te make en auch Peter en Thea Gromme veur de geweldige aovende dao. As litste heb ich toen miene adjudant Ron bedankt veur de fantastische hulp dae hae mich haet gegaeve. Dan nog effe truuk de zaal in um de schitterende daag en vastelaovend aaf te sloehte. Ich vong ut echt hiël sjoën det ich zoeveul postieve reacties kreeg, ich en Ron hebbe os best gedaon. Mer zonger uch waar ut noeits zoe sjoen geweest, minse bedankt veur alles. Ich heb verschillende dinge over gehaoje aan daes daag: de pien in mien bein die trikt wel wèr wig, mer die sjoëne herinneringe allemaol, weit ich zeker det ich noeits zal vergaete. Alaaf Prins Chris I en adjudant Ron
Mèt vastelaovend gaon wae d’r op oeht, same fiëste in de neje Brookhazekoeht!

24 fibberwarie 2009 10:04:34

Van teveure dach ich det de mandig misjien wel de rustigste daag waas van de vastelaovend, mer dao heb ich mich toch grandijoos in vergis. Wat unne sjoëne daag waas det! Ut begos al 's merges um half 11, toen zien Ron, William en ich richting Wiërt gegaon um de neije Brookhaeskes te begroete. Veur Richard en Kim waas ut ein groëte verassing det wae langs kwame. Der zien auch versjillende foto's gemakt van Ron en mich, moeilik kiekend, mèt Tijs en Gies oppe erm. Um 12 oohr zien wae wèr nao hoës gegaon um snel wat te aete. Ron en ich zien 's middigs nog irst nao de optoch in Kepel gaon kiehke, umdet de VCD dao natuurlik mèt duit veur de prieze. Wae hebbe net neet de ganse optoch gezeen, want in Kunningslus waar natuurlik auch nog de kingermiddig. Um ierlik te zien waar ich dao al hiël lang neet miër gewees, mer ich vong ut ech hiël erg sjoën. Ut waar auch erg druk en ich dink det alle kinger zich erg good vermakt hebbe dao. Toen wae net nao 7 oohr gezellig mèt alle kinger op de bühn stonge te danse, kreege wae te huure det de VCD de irste priës hej behald in Kepel. Ron en ich hebbe toen besloote um same mèt Twan hiël snel effe op en neer nao kepel te gaon. Dao aangekome woorte wae ontvange door de vorst dae wel 20 kiër haet gezag wie geweldig det hae ut wel neet vong det wae langs kwaame. Irst un bruudje gegaete en toen de bühn op um idderein toe te spraeke. Ich kos aan de gezichte van sommige nog zeen wie spannend det die ut heije gevonge. Vervolgus bühn aaf un paar polonaises gelaupe en wèr truuk de auto in richting Kunningslus. Dao aangekoome zien wae nao Gromme gegaon, woe ut binne unne mum van tiehd hiël erg druk woort. Toen auch de VCD binne kwaam barstte ut fiëst echt los. Ich vong ut echt geweldig sjoën um mèt idderein polonaises te laupe en te sjoenkele. Jammer genôg kwaam auch aan deze aovend un eind, mer ich waas wel rats aan de pin en ich dink det ich ut toch nog unne daag vol mot haoje. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!

23 fibberwarie 2009 10:03:23
Bej os in de vriendegroep is ut gebroekelik um 's merges veur de optoch in Kunninglus un eike te gaon aete in de kantine van Verhaegh. Wae hebbe os dan auch um elf oohr verzameld um de kookkunste van keukprinsesje Will te beoordeile. Daonao snel nao hoës um mich um te kleije en dan wèr truuk nao Verhaegh. Dao kwaame al versjillende groepe bejein. Um kwart euver twieje zien wae nao de startplaats gelaupe en toen waas os al drek duudelik det ut nivo van de optoch hej erg hoeg is. Prachtig verkleijde groepe mèt good bedachte en grappige ôngerwerpe. Ut waas veur mich auch un hiële sjoëne verassing det auch mien collega's oeht de kas en auch de drumband mèt deej. Auch de wages die mèt deeje in de optoch waare errug sjoën. Zelf stông ich natuurlik op de litste wage um zoe veul snoep nao onger te goije as mer meugelik waas. Hiël spesjaal um det unne kiër mèt te moge maake. Nao det de optoch waar aafgelaupe hebbe wae os in de neje brookhazekoeht verzameld um alvast te gaon fiëste, mer auch um toch wel gespanne te wachte op de oehtslaag. De tiehd vloog veur mich ech veurbej en al snel genôg kos begos waere mèt ut bekind maake van de oehtslaag. Toen ich idderein hej gefelisiteerd en alle kinger un zekske snoep hej gegaeve bin ich toch auch effe bej mien kammereuj gaon staon um de irste pries te viere. Dao nao ging ut daak der wèr aaf en waar ut nog gezellig tot in de late eurkes. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!

22 fibberwarie 2009 10:33:48

Nao neet al te veul te hebbe geslaope, moste wae um kwart euver ein wèr bej Gromme zien um un foto te make. Toen det achter de ruk waas, zien wae vur de litste kiër deze vastelaovend mèt de bus op paad gegaon. De bestumming waar dit kiër Kèpel, woe de machtsoverdrach plaats ging vinge. Irst zien wae in unne optoch mèt alle carnavalsvereiniginge, dansmarietjes, hofkapellen en neum mêr op, van ut gemeinschapshoès nao DOK 6 gelaupe. Dao aangekome, woord der al vrej snel begos mèt ut officiele gedeilte. Ich hej de iër det ich as irste aan de beurt waas. Ich woord nao veure geroope en toen haet de burgemister unne hiële sjoëne proklamasie euver mich veur gelaeze. Toen hae dao mèt klaor waar, kreeg ich nog twieje vraoge gestild: Waarum ich de biste prins van Kunningslus waar en in welk anger dörp ich prins zuuj wille zien. Ze vonge det ich toch wel redelik gepaste antwoorde hej op de vraoge en ich kreeg de sleutel dan auch vrej gemekkelik aangereikt. Toen alle prinse ware geweest woord ut nog erg gezellig, mèt optraejes van Thei en Marij en Bram en Ruud. Auch de dansmarietjes van alle vereinigingen hebbe nog opgetraeje. Natuurlik ware die van kunningslus wietoeht ut biste. Daonao zien wae mèt de bus wèr truuk gegaon, thoes snel gegaete en un eurke later ware we alwir bej Gromme. Auch dao heb ich mig good vermakt: der woorte versjillende polonaises gelaupe en auch de gastoptraejes veele erg good in de smaak. Nao aaflaup heije wae wel honger en toen zien wae mèt alleman nao William gegaon um dao de nuddige bulkes en eier nao binne te wèrke. En zoë kwaam der un eind aan eine kei sjoëne daag. Ich wil nog bej deze nog wel Richard en Kim hartelik felisiteere mèt de geboorte van de twieje kleine brookhaeskes, Tijs en Gies, echt kei sjoën! Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!

21 fibberwarie 2009 12:09:49
Nao hiël lang te hebbe motte wachtte, stong de vastelaovend dan toch op ut punt van beginne. 's Merges zien Ron en ich, Vorst William en ein deil van de raod un bezeukske gaon bringe aan de brookhaeskes in de kresj. Dao woord sjieps oehtgedeild en zien Ron en ich mèt idderein oppe foto gegaon. Daonao hebbe wae nog flink gedanst in de zaal, wat ich hiël erg leuk vong. 's Middigs zien wae nao de liëgere sjoel gegaon. Irst hebbe wae onger begeleiding van de hofkapel un rundje door Kunningslus gemakt. Vervolges zien wae in de klumzaal bejein gaon zitte en woorte der verschillende zeer sjoëne veurdrachjes gedaon. Auch hebbe Ron en ich toen alle kinger un ongersjeijing gegaeve, woenao wae nog un tiëdje hebbe door gefiëst. Ich heb vandaag al gezeen det ut mèt de toekomst wel good zit, want echt idderein deej mei mèt de polonaises. 's Aoves zien wae nao de resepsie van Prins Jeffrey, Prinses Renee en hofdame Charley gegaon. Zoë as gebroekelik haet Vorst William ut woord genome um get euver het prinselik trio te zegge. Naodet wae ze gefelisiteerd heije, kwame de drei dansgroepe eure sjoëne dans oehtveure. Auch woorte der nog verschillende polonaises gelaupe en auch de dansjes ontbroke dit kiër neet. Ich vong ut dan auch eine zeer sjoëne daag. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
18 fibberwarie 2009 11:20:40
As prins wilse natuurlik niks misse en daarum hebbe Ron en ich besloote um auch nao ut prinsetreffe in Remunj te gaon. Same mèt Rob en Nick zien wae um 7 oohr bej Gromme bejein gekome. Dao woorte wae door de Graasvraeters, die ein bus heje geregeld, opgehald. Daonao zien wae door gevare nao Dörp, die auch mèt ginge. In Remunj aangekome waas ut al drek duudelik det der ech hiël veul prinse ware. Nao os te hebbe ingesjreve, zien wae mèt idderein dae mèt waar rech vur de bühn gaon staon, zoedet wae niks koste misse. Hiël veul artieste beklomme ut podium en tussendoor woorte alle prinse nao bove geroope um ein ongersjeijing in ontvangst te neme (van de wienkeuningin!). Onger de optraejes heb ich mich prima vermakt en ich heb zelfs un paar kiër bej de artieste op de bühn gestaon. Ich vong ut veural leuk um te kieke wie die angere prinse der oeht zooge, want der zien mich toch pakke (en spreuke) bej! As aafsloehter kwaam Big Benny ut podium betraeje en wae as heljese prinse koste ut neet laote um veuraan op ut podium te gaon staon (de kemphaze ware inmiddels auch gearriveerd). Ich vong det echt ut sjonste moment van de aovend. Rôngk half ein waar ut helaas aafgelaupe en zien wae wer mèt alleman mèt de bus truuk richting helje gegaon. Alaaf Prins Chris 1 Mèt vastelaovend gaon wae d’r op oeht, same fiëste in de neje Brookhazekoeht!
16 fibberwarie 2009 17:58:49
Wat geit dae tiehd toch snel as ut gezellig is. In ut litste wiekend vur de vastelaovend, waare der nog twieje resepsies. Helaas kos ich neet nao dae van Beringe, umdet hej toen de b&ocric;ngkte aovend waas. Zonnigs zien wae wel um half veer richting dörp vertrokke. Dao aangekome, waar het al drek duudelik det ut nogal druk waar. De minse stonge boëte in de rej te wachte. Gelukkig deurde ut neet al te lang vurdet wae binne stonge. Nao ut gastebook te hebbe geteikend, zien wae langzaam mer zeker nao veur gelaupe. Sjoën waas det ich ongerwaeg nog ein ongersjeijing van Prins Twan I van Beringe kreeg, die ich daags te veure hej misgelaupe. Naodet Vorst William zien weurtje hej gedaon hebbe wae Prins Roy I en adjudant Bram gefelisiteerd en kreeg ich auch van die nog ein ongersjeijing. Toen begos ut wachte totdet de resepsie waas aafgelaupe. Toen Prins Roy alle minse hej bedankt, woort der al drek unne polonaise ingezat. Auch waare wae mèt de prinse wèr regelmaotig op ut buhnke truuk te vinge. Ut waas ech supersjoën um te zeen wieveul minse det der mèt deeje in de polonaises. Ut waas auch wel grappig det de vaere ilke kier van de steek moste waere gehald as wae wèr det buhnke op ginge. Mer jammer genôg kumt der op de ein of angere maneer toch altiehd wer un eind aan zonne sjoëne daag. Naat bezwit zien wae rôngk half nege wèr mèt de bus vertrokke, woenao wae bej Gromme het wiekend nog waardig hebbe aafgelsloote. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
9 fibberwarie 2009 19:24:41
Ut woord mich van teveure al door versjillende aodprinse vertild, mer wat unne geweldig sjoëne daag waar det! Naodet ig 's merges toch effe wat langer in bèd hej gelaege kwaame wae um half twieje mèt de VCD bej os bej mekaar um ein groepsfoto te make. Ich mot ierlik zegge det ich wel un bietje zenuwachtig waas, umdet ich neet wis wat mich te wachte stong. Stieds mier familie kwaam bej os binne. Rongk drei oohr huurde ich in de verte muziek en neet veul later ging bej os de deurbel. Toen ich de deur ope makte, wist ich neet wat ich zoog. Zoe veul minse die hej ware um mich op te kome hale. Echt hielemaol geweldig! Onger begeleiding van de hofkapel zien wae toen nao de brookhazekoeht gelaupe, die echt hiël erg sjoën versierd waar. Um veer oohr woort de resepsie geeupend woenao hiël erg veul minse os kwame felisitere. Ut waar auch hiël apart um allemaol die verhaale te hure die de minse euver mich te vertille heje. Ich wis neet det det dur zoe veul waare. Um 22 minute over 6 waar idderein de resepsietaofel gepasseerd en toen heb ich alle minse bedankt. Daonao ging echt ut daak van de koeht deraaf. Ut is echt onvergaetelik sjoen um same mèt alle minse (en det waare der veul!) te hosse, zinge en weit ich wat der allemaol gebeurd is. Ut waar geweldig um same mèt alle prinse van Helde en auch prins Chris I oeht Lottum op de buhne te staon of der vanaaf te springe. Auch mien kammereuj ware geregeld op de buhne truuk te vinge. Dae ganse tied zitse in eine roes en dur gebeure zoeveul dinge tegeliek desse ut eigelik neet allemaol good kins volge. Ich ging van polonaise nao buhne nao hangtaofel nao nek en wèr truuk. Gelukkig heb ich wel unne goje adjudant, want ich kreeg um maar neet aafgesjud. Mer wat ging dae tiehd toch snel! Veurdet ich ut wis waar ut al aafgelaupe en woort der begos mèt poetse. Nao nog effe rustig wat te hebbe gedronke, bin ich rongk half ein as ein van de lètste nao hoes gegaon. Ut is echt onbesjriefelik wat unne geweldige daag det ut waar, zoeget heb ich nog noeits mèt gemakt, ich zal ut noeits van mien laeve vergaete! Ich (auch names Ron) wil idderein nog unne kier bedanke die op welke maneer dan auch aan deze daag hebbe bejgedrage. Alaaf Prins Chris Mèt vastelaovend gaon wae d’r op oeht, same fiëste in de neje Brookhazekoeht!
7 fibberwarie 2009 13:40:13
In dit redelik drukke wiekend, stong as irste ut OJB prinsebal op de agenda. Um half acht zien wae mèt de raod in de brookhazekoeht bejein gekome um te gaon kiehke weem de nieje prins en prinses van de OJB en auch weem ut nieje boorebroedspaar zoe waere. Natuurlik mos irst prins Aaron en prinses Linda aaftraeje. Toen die eur aafschiedswuerdje heje gedaon, woort alles klaorgezat vur de onthulling. Nao un paar minute begos toen unne dans achter un gordien mèt un lamp derachter, woedoor se allein mer schaduwe zoogs. Toen de muziek aaf waas gelaupe, spronge de neje prins, prinses en boorebroedspaar door het gordien en woort der flink wat confetti de loch in geknald. Toen alle kroetdampe waare opgeklaord koste wae zeen det de prins neemus minder dan Jeffrey Cox waar en de prinses waar neemus minder dan Renee Smets. Het boorebroespaar besteit oeht Siem Huberts en Linda Boots. Naodet auch de neje hofdame, Charley Verschaeren, nao bove waar gerope, woorte Ron en ich nao bove gerope um het neje trio in eur outfit te heise. Toen det gebeurd waar kos ut fiest beginne. Gelukkig bin ich zelf auch nog neet zoe aod, dus ich kos de miste dansjes nog wel. Um elf oohr waas het helaas al gedaon, mer ut waas wel unne geweldige aovend. Alaaf Prins Chris Mèt vastelaovend gaon wae d’r op oeht, same fiëste in de neje Brookhazekoeht!
6 fibberwarie 2009 18:13:09
Ut is inmiddels un tradisie gewoore det de prins en adjudant un bezeuk bringe aan de groepe die unne waage doon bouwe. Woensdigaovend zien Ron en ich daarum auch, mèt twie kretjes beer in de kattebak, uns gaon kieke wie ut der veur stong mèt de wages. Allerirst zien wae nao de wage van de swaffelaers gaon kieke. Os woort al in detail oehtgelag wie de wage der oeht mos kome te zeen en wat allemaol de bedoeling is. Ich mot zegge det de wage, auch al waas dae nog neet aaf, der al hiel sjoen oehtzoog. Nao un paar bekskes koffie hebbe wae die jonge mer wèr mèt rust gelaote, want der mos wel nog ut ein en anger gebeure dae aovend. Toen zien wae nao de wage van de VCD gegaon. Auch dao wurt dit jaor wer unne hiele sjoene wage gebouwd. Hopelik kumt dae wel op tiehd aaf, want um de ein of angere raeje hebbe die jonge ut wat drukker gekrege dees daag. Auch bej de VCD hebbe wae nog wat koffie en un fleske beer gedronke veurdet wae wèr nao hoes ginge. Al mèt al kenne wae wel zegge det der wèr hiele sjoene wages mèt gaon doon in de optocht in Kunninglus, die waarsjienlik auch in angere optochte hoege auge gaon goije. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
8 fibberwarie 2009 11:53:54
Nao neet al te veul te hebbe geslaope zien wae zatterdigs nao de resepsie van de Oelewappers gegaon. Vanoeht Grommen, zien wae onger muzikale begeleiding van de hofkapel nao Savelberg gelaupe. Dao aangekome hebbe wae de Prins, Vorst en de ganse raod van elf un ongersjeijing gegaeve. Auch ich kreeg un ongersjeijing van prins Twan umgehange. Toen de resepsie waas aafgelaupe koste wae beginne mèt polonaises laupe. Zeker op Savelberg is det hiel sjoen. 's Aoves zien wae nog nao de kirk nao de Heilige Mis geweest, woe ich ein stukske mos veurleeze. Toen die waas aafgelaupe, zien wae nao de brookhazekoeht gegaon um derveur te zorgen det die mèt de resepsie der hiel fijn oeht zuut. En ik kan wel zegge det det is gelukt! Alaaf Prins Chris Mèt vastelaovend gaon wae d’r op oeht, same fiëste in de neje Brookhazekoeht!
2 fibberwarie 2009 10:21:55
Nao vurrige waek de irste twie resepsies te hebbe gehad, stông op zonnig de resepsie in Kepel op de agenda. Um half 4 zien wae bejein gekome um te vertrekke nao de Kuuzetempel. Bej Dok6 aangekome stôong der al ein ganse rej minse te wachte um prins Raymond1 te feliciteren. Gelukkig hoofde wae mèt de Brookhaze neet achteraan aan te sloehte, mer moogde wae alvast in de zaal gaon staon. Nao un tiedje woorte wae nao veur geroope um prins Raymond1 te feliciteren. Toen Vorst William zien weurdje hej gedaon, zien wae mèt alle Brookhaze tegeliehk naeve de resepsietaofel gelaupe. Umdet wae redelijk vreug ware, hebbe wae dao nao nog wel unne tiehd motte wachte veurdet de resepsie waas aafgelaupe. Mer toen ut zowiet waar, barste ut fiest wèr los. Ut waar auch zeer sjoen um wèr bej te kinne praote m&egrvae;t de angere prinse wie die de irste waek belaefd heje. Jammer genog kwaam der al veul te vreug ut sein det de bus wèr klaor stong, mer gelukkig waas ut auch bej Gromme nog errug gezellig... Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
1 fibberwarie 2009 11:12:11
Onverwachts kwaam der dit jaor ein extra resepsie op de agenda te staon. De waek veur het prinsebal in het brookhazeriehk, krege wae s' merges un smsje mèt de mededeling, "Chris is prins". Wae snapte der thoes niks van en ich begos al te twiefele of ich mich neet verraoje hej. Mer gelukkig veel toen ut kwartje: mien naef (auch Chris) waar prins gewoore in ut Peggereik in Lottum. Wae hebbe toen al drek aafgesproke dao auch nao de resepsie te gaon. Um half acht zien wae mit drej auto's richting Lottum vertrokke (wae heije beslote um de raod deze kier neet mèt te neme, umdet het mieredeil dao van in Ingeland zoot). Ut veurdeil van familie zien is, desse neet lang hoofs te wachte veurdesse aan de beurt bis. Naodet vors William zien weurtje hej gedaon, kreeg ich un ongersjeijing van Prins Chris I. Mer auch ich heb Prins Chris mer geliek ongersjeije. Daonao hebbe wae nog unne hiele tied motte wachte veurdet de resepsie aaf waas gelaupe, want der woorte nog verschillende sjoene veurdrachte gedaon. Naodet ut zowiet waar hebbe wae mit de ganse familie en auch de mitgereisde brookhaze nog flink doorgefiest. Rongk ein oohr, waar ut veur os laat zat en zien wae wer mèt os twieje auto's richting ut brookhazeriehk vertrokke, woe wae nog un lekker eike hebbe gegaete. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!

15 fibberwarie 2009 12:37:31

Zoeas illik jaor, woort der auch dit jaor wer un foto gemakt van alle prinse oeht de regio. 's Middigs zien vorst William, Marlie en Ich dan auch nao de Stad gegaon um te poseere vur de fotograaf. Ut is bis wel lache um sommige angere prinse te zeen, wat ein gekke pekskes hebbe die soms toch aan. Nao de foto hebbe wae os mèt de prinse van Helje neet nao hoës laote jage en zien wae nog rustig in de cafe blieve plekke. s'Aoves stông de bôngkte aovend op het program. Umdet de neje koeht nogal groët is, waas der veur gekoze um dit jaor mer eine bôngkte aovend te haoje. Um 7 oohr ging de zaal oope en um kwart vur 8 kos ut beginne. Toen wae mèt de raod nao binne trokke veel ut mich al drek op wie druk ut waar en auch wie sjoën det der wèr versierd waar. Ut irste optraeje van de aovend waas van de dansmarietjes, die echt unne hiële sjoëne dans heije ingestudeerd. Toen die gewees ware, kreeg ich toch al wat roeje wengskes. Dao nao waar ut tiehd vur de irste buut. Ich mot zegge det de lachspiere flink woorte belas door de chirurg. Daonao waar ut tiehd vur de vlaegelkes, die ein sjoene parodieact op veurde. Toen waas ut alwèr tiehd vur de twidde buut, woe bej auch wèr flink gelache woort. Toen waas ut de beurt aan de irste dansgroep van de aovend, die as piraate verklejd auch eine hiële sjoene dans heije ingestudeerd. Net veur de pauze waar bejeingerapt aan de beurt, die eur winnend nummer van dit jaor nog uns ten gehuure brachte. Nao unne sannitaire pauze woord der wier gegaon mèt de letste buut van de aovend. Ger Frenke kwaam as collectant op de buhn en waar der auch nimmer wig te kriege, mer wat hebbe wae gelache, mien gezich duit der nou nog pien van. Vervolgens waas de litste dansgroep aan de beurt, die heije eine sjoene dans op ut leedje thriller. Nao nog roejere wange te hebbe gekrege, waar ut de beurt aan trio ongeplök, die erg leuke liedjes ten gehuure brachte (mèt as aafsloeter 'wat zaet der!') Aafsloeter dit jaor waare de Geraniums, die mèt eur liedjes en eure Tegelse, de aovend waardig aafsloote. Toen ut programma aaf waar gelaupe ging ut fiest nog lang door in de koeht. Ich vong ut echt unne geweldige aovend en zeer sjoen um alles uns van de angere kangk te bekieke. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
26 jannuwarie 2009 09:45:37
Daags nao de geweldige resepsie in Graashook, stong de volgende resepsie al wèr op de agenda. Mer veurdet ut zowiet waas, hebbe de leeje van de VCD en auch van de CV iers de ganse daag versiert bej mich en Ron thoës. Ich mot zegge det ut der hiël erg sjoën oeht zuut (als gae mich neet gluift, mot gae mer unne kier kome kieke). s’aoves zien wae um half nege bej elkaar gekome um mèt alwir un ganse bus vol minse nao Egchel te gaon. Dao aangekome bleek det wae gelukkig al snel aan de beurt ware. Naodet ich Prins Jack (mien achternaef), Resie en de jeugdprins en prinses gefelisiteerd hej, zien wae in de zaal gaon staon in aafwachting van al det kome ging. Toen rongk de klok van tien de resepsie aafgelaupe waar, kwaam de stumming der al vrej snel in. Auch in Egchel woorte der flink wat polonaises gelaupe en later ware der nog twie gastoptraejes van de lokale carnavalsartieste. Toch sjoën um te zeen det asse vanoeht de buhn de zaal in kieks, idderein steit te springe en fiëste. Mer auch aan deze twidde resepsie kwaam un eind en um ein oohr woort ut sein gegaeve det de bus klaor stong. De stumming woort der echter neet minder op en der woort dan auch flink gezonge op de truukwaeg. Bej Gromme aangekome ging ut fiëst nog gewoën door tot in de late eurkes. Jammer genog zit nou mien irste volle wiekend als Prins der op, en kenne wae alwèr toelaeve nao volgend wiekend als wae op bezeuk gaon in Lottum (woe mien naef prins is gewaore) en Kepel. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
26 jannuwarie 2009 09:42:33
Nao un waek vol felisitasies, waas ut tiehd vur de irste prinseresepsie. Um half nege zien wae bejeingekoome bej Gromme um mèt un ganse bus vol nao de zustervereiniging oppe Graashook te gaon. Mien kammereuj ware der auch bej en die heije ein groete verassing veur Ron en mich; ze hejje spesjaal T-shirts laote drukke mèt os der op, die ze (det zeije ze tenminste) de ganse carnaval aan heele. Oppe Graashook aangekoome bleek det ut bist wel druk waas, zoe druk zelfs det wae iers nog unne tiehd boete hebbe motte staon wachte. Ut deurde dan auch redelijk lang veurdet wae veuraan in de rej stonge um prins Peter II en prinses Wilma te felisiteere. Naodet Vorst William zien weurtje hej gedaon, kreeg ich un ongerscheijing van pins Peter II. Umdet wae als lètste vereiniging aan de beurt ware, kos daonao auch geliek waere begos mit fieste. Geweldig um same mèt de angere prinse op de bühn te staon en flink los te gaon. Jammer genog kumpt aan al det fieste un eind, en rongk de klok van ein zien wae dan auch wer mèt de bus richting ut welbekinde Brookhazeriehk vertrokke, waor wae bej Gromme nog ff gezellig nao geborreld hebbe. Ps. Mien exkuus det gae zoë lang op mien bejdraage hebt motte wachte, mer bej os thoes haet ut ganse wiekend internet en de tillefoon der oeht gelaege. Alaaf Prins Chris I Mèt vastelaovend gaon wae d’r op oeht, same fiëste in de neje Brookhazekoeht!
19 jannuwarie 2009 10:04:43
Nao waeke te hebbe motte zwiege waas dan eindelijk toch de daag van het prinsebal aangebroke. In tegestelling tot angere jaore, waas het dit jaor vur ut irst in “de Sprunk” oftewel de neje Brookhazekoeht. Vur ich het vergaet mot ich de carnavalsvereiniging alvast un compliment gaeve, want de zaal zoog der prachtig versierd oeht. Zoe as gebroekelik woort der irs begos mèt het aaftreje van de veurige prins. Toen Prins Thijs de 1e en ziene adjudant Hans alles ingeleverd heje, begos ich dan toch wel echt un bietje te razele in de zaal. Umdet ich moeilijk allein nao achter kos laupe, woorte der ein paar minse oeht de zaal gehald. Ich mos toen achter ut gordien in un raket gaon zitte en toen de gordiene ope ginge waare der volges mich wat enge menkes die rôngkleepe en auch nog unne dans van de dansgardes. Dit zal ich nog truuk motte kieke want hej heb ich jammer genôg niks van mit gekrege. Toen der aafgetèld woort mos ich dan toch echt oeht die raket zeen te kome en kos idderein zeen det ich de neje hierser waas. Veural vur mien pap en mam en auch mien kammereuj waas het ein groete verassing. Ich heb toen mer snel miene rechterhand Ron bekend gemakt, want um allein op die buhn te staon is aug mer niks. Daonao zien we os um gaon trekke en naodet wae os de steke heje opgezat en de medailles heje umgehange waas het tiehd um de proklamasie veur te laeze. Dan snel van de buhn aaf um de nuddige hendjes en kusjes te mooge ontvange. Daonao kwaam het fiëst op gang en nao de nuddige polonaises te hebbe gelaupe en bej mien kammereuj op de sjouers te hebbe gezete waas het nao mien meining vul te vreug aafgelaupe. Wae hebbe toen dus aug mer besloten um mèt un deil van de raod en un deil van de kammereuj bej os eier te gaon aete. Toen de letste nao hoes ginge zaat miene irste daag as prins der op en ich kan zegge det ich ut echt un geweldig sjoene belaefenis vong en ich hoop det der nog veul sjoene daag gaon volge. Mer volges mich (en Ron auch) kumt det wel good, want Mèt vastelaovend gaon wae d’r op oeht, same fiëste in de neje Brookhazekoeht!
   
© C.V. de Brookhaze | 2000 - 2018