Ut Motto vur 't seizoen 2018 - 2019 is:  
''Sjitterend

   

2007 Peter de derde (Lormans)

20 fibberwarie 2007 00:00:00
Lekker oehtgeslaope oeht béd, wel mit 'n bietje 'n diek bein; 't herstelvermoge en de weerstand begint nao te laote, mer we haoje vol. Ônger 'n straolend veurjaorszunke nao de Poorter um te verzamele veur d'n optocht dae béj de broeloft van Lynn & Freek huurt. Rôngk dréj oor aangekome béj de groëte koeht veur de onheilige Mis van 't paerke. Nog effe wat veurgepraot en daonao genote en gelache mit 't verbinge in d'n onecht. Natuurlik de resepsietaofel gepasseerd en lekker huidvleis & dieke worst gegaete. Toch wel unnen daag dae 'n dubbel geveul heet veur de Prins; 't einde is in zicht…. Langzaam opgewermd begonne aan d'n aovend en zoe good en kwaod meugelik veurop gegaon wat in de leste eurkes as Prins neet mekkelik is. Maar de minse in de zaal holpe mich d'rdoor heen (mein bein woort maar dieker) en de volle koeht ging langzaam oeht eur daak. Zeker toen Rob Heesen same mit mich 'n live-optraeje verzorgde mit "Idder jaor opnéj". Geweldig Rob! Maar dan mot 't dan toch gaon gebeure; de aafsloehting. Ônger de heite lampe begos Vorst Wullem mit zien betoog. Idderein woort bedankt (auch bedankt mam desse d'r waars) en 't waas emotioneel det de femilie Heynen mit 't jôngste Brookhaeske Suus in 't zönke woort gezat umdet ozze Jan 22 jaor lid waas van de Brookhaze. Prachtig en diek en dubbel gegund. Nao alle sjoën weurd van Joeccius kumpt dan 't moment desse aafsjied moogs gaon neme van carnavalsvierend Kunningslus. Idderein woort bedankt en asse dan mit dae microfoon euver de köp kieks geit d'r echt wel wat door dich haer. Asse as carnavalsmeziekliefhebber Prins moogs waere dan is 't dingk ich 'ns iets gans angers um neet praotende de minse te bedanke mer zingend en dus aafgeslote mit unne zelfgesjreeve tekst euver 't geveul van vastelaovend wat béj mich laefde en zal blieve laeve. 't Waas zeker neet mekkelik, mer asse zuus wie de volle zaal reageert dan sterkt 't dich en dan is det allein maar kiepevel. Auch gae hebt mich zeker gerakt, mer béj mich kumpt det later nog wel 'ns d'r oeht…. Gewoën geweldig! Dan moogse nog effe de zaal in um te fiëste, mer dao kriegse bijna ginne tiehd veur want doe mos allein mer hendjes sjudde. Schitterend wat veur reaksies desse kriegs, zoewel ich as José. Mit de kids en Ron & Wendy en de kids nog same in de midde gesjoenkeld en langzaam ging vasteloavend 2007 veur ôs oeht. Bale…….. Minse, sjoën det ge d'r in zô'n groëte getale waart béj de veule, veule activiteite; 't geit d'r neet um wie se vastelaovend viers, asse 'm maar viers en det deet gae zeker! 't Waas onvergaetelik, wae hebbe genote van euch en hopelik hebt gae det auch van ôs…. BEDANKT en we zeen ôs…… Brookhaas blief se hiel dien laeve, mit vastelaovend same, efkes alles gaeve!
17 november 2007 00:00:00
Vanaovend de officiële start van 't seizoen 2007-2008 gehad mit ozze "jubileum"- Liedjesaovend. Waem zoei d'r dit jaor hoëge auge gaon gooje? De generale repetisie héj mich auch al niks wiezer gemakt, dus 't woort spannend…. Geweldig; 12 liedjes op de bühne, mer 't sjonste is nog det idderein, jôngk en aod" wer waas vertegenwoordigd. D'n aovend vloog veurbéj en 't talrieke publiek woort op 'n muziekale maneer prima vermakt. "n Bietje 'n dubbel aafsjied vanaovend: de litste kier mit Wurt Niks op de bühne (nog bedankt veur de ôngersjeiing CV) en mien liste activiteit as Prins veur 't komende prinsebal. Wat zal 't al kriebele béj dae néje! Dao euver zônge Bram & Ruud dan auch rôngk de klok van 0.00 oor; die ginge de "Prinsverraoje" en auch ich dink det ich 'm al gezeen heb. De zaal ging oppe kop door 't gastoptraeje van dees 2 sympathieke gaste ("Die zien kwant…."). En toen….toen begôs 't wachte, wachte, wachte….. 't Waas in idder geval neet de snelste jury van al die 11 jaor, ha,ha…. Eindelik kwaam vorst Joeccius mit de lang verwachte oehtslaag . De maedjes van Béjeingerapt ginge allerirst door eur sjoën creatie mit de presentasiepries strieke. Naodet resp. Drek (3e) en Hagel & Slaag (2e) al de bühne op ware gekome, waas 't dan eindelik zoewiet; de toeriste van Tren & de Men flikde 't kunstje veur d'n twidde kiër en woorte daomit de terechte winnaars van dit jaor. As finale woort "D'n toerist" nog uns ten gehuëre gebrach veur 'n enthousiast publiek en daonao woort d'r nog effe gezellig naogepraot. Aan alle winnaars nog uns unne dieke proficiat en wae gaon zeker knalle in Méhl mit Tren & de Men! Komende waek same mit Albert nao Marlstone um de "gepimpte"versie op te neme van "Vastelaovesmaedje"; ein van de sjônste kado's oeht miene Prinsentiehd. Geweldig um mit te moge make! Wae winse idderein alvast sjoën daag en natuurlik un fantastisch en gezôngk 2008! Wies op 5 jannuwarie um te zeen waem de néje wurt van de Brookhaze. We zeen ôs! D'n aoje…..en 't maedje. Brookhaas blief se hiel dien laeve, mit vastelaovend same, efkes alles gaeve!
16 november 2007 00:00:00
As d'n 11e van d'n 11e is gewees begint d'r béj veul leefhebbers get te kriebele. Zoe auch natuurlik béj mich…..eindelik mocht de steek wer oeht de kast en ging 't vastelaovesseizoen 2007-2008 van start. Vandaag op nao Ves in Beringe um dao aanwezig te zien op de 4 x 11 - jubileumresepsie van de Beringse Kuus in de prachtige néje, maar wel spekgladde Kuuzetempel. Maak ich dus toch nog 'n Beringse resepsie mit. En dus auch nog unne liste kier mit de collega-prinse en eur maedjes same fiëste. 'n Anger geveul as mit de vastelaovend (det de meiste prinse auch héje); doe merks onbewust toch desse as Prins in gedachte al 'n bietje aafsjied haes genome. Mer toch…."d'raan wie Blücher" en letterlik mit valle en opstaon (glad, gladder, gladst…..) de tent op stelte gezat mit de Raod en de maedjes. Zeker auch door de supermeziek van Kartoesj; gelukkig is eure meziek baeter dan zie zelluf. Ze zinge hoëg mer sommige van eur haeje 't jammer genôg auch 'n bietje erg hoëg in d'n bol. Mer det mocht de pret neet drukke. De zaal waas werkelik 'n prachtig "sjraöme en baöme"-koër. Genote. D'n aovend vloog um en veur det ich 't wos zoote we alwer béj Gromme. Merge ozze liedjesaovend mit de meiste deilnemers van Helje; heerlik……wer same in de koeht geniete van unne top-aovend mit 12 néje schlagers! Idderein veul succes! Wies dan! Brookhaas blief se hiel dien laeve, mit vastelaovend same, efkes alles gaeve
19 fibberwarie 2007 00:00:00
's Merges deep gekeke nao de kleurplate van de jeugd; same mit Adje & Wullem gejureerd waem det de X-factor mit kleure héj. Um 14.30 oor nao de koeht um aanwezig béj de kingermiddig um te gaon fiëste mit de klinste en get grottere haeskes. Nao 't wat vreuge optraeje van de googchelaar, begos de middig wat langzaam op gang te kome. Veul hendjes en unne aai over d'n bol motte gaeve en duk gezwaaid nao de kids. Tevens de maedjes de prieze oehtgereikt van 't kleur en 't bist verkleide Sneeuwitje in 't zunke gezat. Same gefiëst op 'n anger maneer wies aan de klok van acht, wao nao d'n aet klaor stông en we same mit Raod & bestuur 'n hepke koste aete. Vanaovend steit 't bal béj Gromme op 't programma mit 't néje duo 12 (of Bob & Marley?); we laote ôs verrasse!! As kritisch beluusteraer van meziek woort ich inderdaad verrast; allemaol prachtige meziek, vloeiende euvergange en regelmaotig sjaele wazel. Jos & Frank bedankt en geniet van 't kadootje. Kortom…..unne supergezellige en drukke aovend. Sjoën um te zeen det de jeugd good mit deej en 't hiel lang vol heel. Flink geknald en same mit de roei jes en alle aanwezige 'n sjoën fiëstje gebouwd. Brookhaas blief se hiel dien laeve, mit vastelaovend same, efkes alles gaeve!
18 fibberwarie 2007 00:00:00
Um 11 oohr béj de Poorter de meziek wer op orde gemakt en toen drek nao Verhaegh gegaon um op oehtnuddiging van VC de Dörpsgekke 'n eike mit te aete. Prachtig um te zeen wie det d'r sommige de daag d'rveur al ônger d'n trein zien gekome, maar….. "'s aoves unne vent, 's merges unne vent!" De groëte optochtdaag is aangebroke; toch 'n bietje 't geveul van spanning gemist wasse haes asse zelf mit d'n optocht mit duis. 'n Anger belaeving as normaal, mer zeker neet minder sjoën. Béj 't opstelle al verstild gestaon van de prima verzorging en de veule, veule ludieke dinger die d'n optocht zoe biezônger make; prachtig…. auch de kammeraöj ware wer zeer prominent aanwezig. Dankjewel allemaol. Te veul slok gegoojd en ondanks 't feit det d'r mier te strouwe waas dan angers waare we d'r bijna door haer in d'n bocht béj os mam. Auch nog mit riest bekogeld, mer wae zien van alle merte thoes en dus mit ôs eige zekske riest truuk gegoojd, ha, ha……In de koeht wer kinne buurte en mit veul minse 'n pilske kinne drinke veurdet 't echte fiëst los barstte. Wat ein minse allemaol; asse béj de priesoehtreiking euver de zaal oeht keeks (mien roete beslooge d'r zelfs van!) bekruupt dich 'n geveul van trots. Wae kinne méj wel 'ns same sanikke um niks in ôs durpke, mer asse zuus wat veur 'n saamhorigheid d'r is in Kunningslus in de sjônste tiehd van 't jaor dan kinse dao allein maar van geniete as Prins en as mins. Wat 'n drukte wer in de koeht! Geweldig! De ker getrokke wies det de ker neet mier getrokke hoofde en kos waere. Rônk middernacht waas de piep leeg béj mich, José en zeker de kids. Thoes nog effe d'n inwendige verzorgd en nao bed…..gelukkig (of jammer genôg?) nog 2 daag te gaon…. Brookhaas blief se hiel dien laeve, mit vastelaovend same, efkes alles gaeve!
17 fibberwarie 2007 00:00:00
De letste 4 wagebouwers 's merges verblied mit 'n kretje beer en ônger de indruk gerakt van de kwaliteit die die jônges en maedjes toch in 'n paar waeke veur mekaar kriege. Neet te gluive…..'s Middes de foto's gemakt mit de Brookhaze-femilie en toen op nao Kepél um de macht te kriege. Nao de officiële optocht woorte wae opgevange door An & Greet die bliekbaar erg ônger d'n indruk ware van ôs Prinse. Mien vaere ôngertusse gered van 'n fikske, maar nao de nuddige opdrachte woort 't dan eindelik tiehd um de macht te vraoge. Ich mos 'n puzzelstuk make mit dao iets op euver mich en Kunningslus. Daarum dus maar unne puzzle gemakt mit 11 d'r op en zoë oehtgelag waarum 11, Kunningslus en vastelaovend béj elkaar huëre. De sleutel toch mit gekrege en daonao nog lekker kinne buurte mit mien collega-Prinse. Aafsjied genome en ze allemaol unne sjoëne vastelaovend gewinst. Op tiehd nao de kliene koeht veur de BBZ, vanaovend mit DJ Antonio; in 'n bomvolle café genote van alle optraejes mer auch van alle speciale optraejes van bepaolde dames. 't Waas heit, gezellig, sfeervol en drök en zoe huërt det auch aan de veuraovend van de vastelaovend. "Un good begin is 't halve werk!" Traditioneel wies in de vreuge merge nog same mit de Raod gehaktbölkes mit roëd (-geal & greune) saus gegaete; erg lekker…. Brookhaas blief se hiel dien laeve, mit vastelaovend same, efkes alles gaeve!
16 fibberwarie 2007 00:00:00
Iets verlaat aangekome oppe creche door unne mantel dae nog neet druëg waar béj de staumeréj; uiteraard woort det vakkundig opgelost door Adje dae bökend binne kwaam oppe crêche det hae mich kwiet waas; mer ich waas d'r gauw genôg en nao de nuddige denskes en chips, koste de foto's gemakt waere en auch de medaalies woorte ein veur ein umgehange béj ôs allerklinste haeskes. Daonao d'n optocht van de sjoël mitgelaupe; zelf maar meziek gemakt mit de megafoon en same gezonge mit de sjoëljeugd. Auch in sjoel nog efkes gepolonaisd mit Ron en de jeugd van jôngste groepe. 's Middags nao de koeht um getuuge te zien van de sjoëlzitting; 't waas good verzorgd en veural de echte live gezonge leedjes (en zeker de rap) ware "kei-vet". De jeugd 'n kadootje gegaeve, de medaalies umgehange en veul slok gestraud nao aaflaup. Wies 'n oor of vief blieve plekke. 's Aoves wer nao de zaal um 't prinselik trio van de OJB te felicitere; wer get mier denskes gelierd, mer auch de jeugd betrapt op 't feit det ze zeker nog neet alle denskes kinne. Die dus uiteraard effe veur gedaon mit Adje Ron. Same mit 't (jeugdige) volk genote van unne leuke aovend. Auch 'n bietje mit dank aan DJ B. Brookhaas blief se hiel dien laeve, mit vastelaovend same, efkes alles gaeve!
14 fibberwarie 2007 00:00:00
DJ vergadering "de Poorter" Vanaovend béj De Poorter mit Thea, Peter en de Curry & Van Inkel van Kunningslus, 't illustere duo 12, meziek oehtgezoch en ônger 't genot van 'n drenkske "vergaderd" euver de invulling van 't carnavalsbal op manjig béj Gromme. Laot uch maar verrasse! Det belooft wat! Brookhaas blief se hiel dien laeve, mit vastelaovend same, efkes alles gaeve!
13 fibberwarie 2007 00:00:00
Asse 'n jaor geleeje al gevraogd wurs um op te traeje op de zitting van de Wietel makt 't niks oeht ofse Prins bis of neet, doe geis dao naatuurlik en läots de bejaarde medemins op eur eige maneer 'n stukske geniete van de vastelaovend. Mit ziene doorluchtige hoëgheid Prins Roy d'n 1e van Kepél de zitting dus groëtendeils béj gewoënd. Daonao same mit Albert "live" gezonge; gezeen de reacties oeht de zaal waas 't gelökkig "Te sjoën um waor te zien" um ôs te huëre. De hendjes ginge op elkaar. Snel d'n auto in um nao Remunj te gaon veur 't Prinsetreffe. Doe kieks dich de auge oeht en huërs de meist néje (onbekinde) meziek. Veul op 't podium gestaon mit mien collega's en toch wel motte lache mit alle creaties die dao rôngk laupe. Auch det mosse ins gezeen en mitgemakt hebbe. Veul lol gehad en aaf en toe de tiehd gehad um te klasjeneere mit de minse. Jammer det kammeraod Willie d'r neet béj waas. Eigelik wel te laat thoes; mot merge gewoën wer aan 't wérk….. Brookhaas blief se hiel dien laeve, mit vastelaovend same, efkes alles gaeve!
11 fibberwarie 2007 00:00:00
Oehtgeslaope op nao Gromme um Eric in Dörp te felicitere in de heite Zoes. Asse dan onnog unne "heite" DJ haes, dan mosse d'raan wie Blücher. Errug gooje meziek, maar auch meziek waodoor se weinig "rust" kreegs. Maar ja, det huurt d'rbéj; 't daak ging d'r aaf en Dörp kos trots zien op 't sjoëne fiëst. De roei jes leete zich wer supergood zeen; zelfs same mit Anton (aus Tirol) op 't podium gestaon. Um halluf 9 kapotmeug en zônger druëge draod aan 't lief truuk nao Gromme. Dao klonk de bel en nag effe naogepraot mit Thea & Peter en de wieze raod. Nog effe en dan steit de vastelaovend al echt veur de deur…..wat geit 't toch snel… Brookhaas blief se hiel dien laeve, mit vastelaovend same, efkes alles gaeve!
10 fibberwarie 2007 00:00:00
Um 10 oohr wer oeht de vaere en nao 'n ontbijtje rôngk 'n oor of 11 mit de vaere op nao de stad mit Joexius um mit veul anger Prinse de foto veur de gazet te make; mien auge oehtgekeeke,(wat unne kale zeiver béj sommige), gewoën lache um det allemaol te zeen…ha,ha. Drek wer vertrokke um nao Heel te gaon um efkes 'n hendje te gaeve aan de zoon van miene collega, jeugdprins Lars van de Baere. In vol ornaat mit Wullum d'n auto in en binne 'n halluf eurke in Heel belandt. Dao aangekome gevraogd waor de resepsie van de jeugdprins waas. Nao dök vraoge (wat gek?) eindelik oppe plaats van bestumming maar ginnen einen auto oppe parkeerplaats. Dus…nao binne en vraoge of we missjien te laat ware. Tja….we ware dus neet te laat, maar unne daag te vreug…oeps, neet te gluive….ha,ha…Miene collega toch maar effe gebeld en dae zei (terecht) det hae bléj waas veur mich det mien resepsie al gewees waas; ich dink toch det ich de plaats Heel nog wel dökker huër de komende tiehd. 't Kadootje aafgegaeve béj Lars thoes en 'm nao 'n paar tasse koffie unne sjoëne vastelaovend gewinst. Oppe truukweeg veul en dök gelache. "Adje" Ron opgehald um aan Suus, ôs jôngste Brookhaeske, 'n bezeuk te bringe. Kim & Richard van herte gefeliciteerd mit eur wölkske en Suus 'n kadootje euverhandigd. Names de vereiniging Suus daonao 't jôngste lid van de Brookhaze gemakt. Prachtig det 't maedje al 'n medaalie van de Prins um héj. Same mit opa Jan, Oma Jo en Kelly 'n besjuutje gegaete en zoe waas de middig wer snel um. Auch d'n twidde bônkte aovend waas wér oehtverkoch; missjien waas hae nog wel gezelliger dan gister. Alle artieste passeerde opnéj de revue en idderein vermakde zich wer opperbést. Monique waas 'n echte Jane en de danseresjes van eige bodem woorte vanaovend verrast mit 'n kadootje names de Hampelemen. Zelluf woort ich verrast um "Idder jaor opnéj" te moge zinge mit Albert. Auch 't "You'll never walk alone" mit Benny waas fantastisch. Asse zuus det de ganse zaal van veur wies achter mit de heng umhoëg mit galdert, dan is det gewoën kiepevel! D'n aovend vloog veurbéj en veur desse 't wits zit se al achter de eier béj Ron & Wendy. Leuk waas 't serenaadje van Aukje en Emiel names de Hofkapel. Nog geprobeerd um zelluf te traöte, maar ich dink det ich te weinig "embouchure" (oftewel "lupcontrôle") heb um oeits iets te kinne beteikene veur de famfaar. Enne….sorry, bure veur 't geblaos in de lôch Brookhaas blief se hiel dien laeve, mit vastelaovend same, efkes alles gaeve!
9 fibberwarie 2007 00:00:00
De waek deurt te lang; gelukkig is 't wér vriedig. Vanaovend lache en geniete van de kolder dae béj unne bônkte aovend huurt. Veur unne oehtverkochte zaal mit 'n wat jônger publiek, opende ôs dansmarietjes veulbelaovend mit "Rosamunde". Daonao kwaam Robert van Lamoen as "skeidsrechter" (kwaam wel dök in Egchel…) en dae héj de irste lachers al drek op zien hangk. De Bretelboys stônge in de startblokke en mit echte "Toon Hermans"-humor leete dees men nog mér 'ns zeen waarum det ze al miër dan 40 jaor mit succes op de planke staon. De irste showdansgroep van eige bodem verzorgde 'n prachtig "Wild dance"-optreeje en Peter Vaessen zorgde det de zaal oppe kop ging mit zien "iërlike" buut euver 't getrouwde laeve. "Drék" makde 't daonao vakkundig aaf mit eure winnende schlager en zorgde d'rveur det de kaelkes opegereete woorte en det de zaal good opgewermd aan 'n korte pauze kôs beginne um zich op te make veur 't twidde deil van d'n aovend. Toen we de plasgootjes wér héje opgeborge kwaam "Kwakkie" Wim Joosten ôs vertille wat Klazien oeht Zalk vreuger al deej. De aodste showdansgroep zorgde d'r aansloehtend veur det Prins & Adjudant in gedachte wer efkes truuk ginge nao de jaore 80 mit "I've had the time of my life" oeht Dirty Dancing. Auch dit waas geweldig. De "Two Petjes" leete zeen des se mit weinig (of veul?) talent wiet kins kome in de showbizz; "Me Tarzan, you Ans, ehhhhh…..Jane". Wat d'r in de jungle neet allemaol gebeurt! Smaale Big Benny zorgde det de zaal ziene climax bereikte; werkelik idderein leet de binkes van de vloer gaon en volges mich is d'r nog noeits "gestagedived" op unne bônkte aovend. Unne waerdige aafsloehter. Toen 't Brookhazelied héj geklonke kos ich eindelik 'ns doon waor ich eigelik nog amper aan toe bin gekome as Prins; effe buurte en 'n pilske drinke mit idderein. Lekker veul gewazeld en um 'n oohr of 3 tevreeje op hoes aan gestiefeld. Brookhaas blief se hiel dien laeve, mit vastelaovend same, efkes alles gaeve!
5 fibberwarie 2007 00:00:00
's Merges de slaop ongerbroke um mit Bongo Adje (Ron) vastelaovesles te gaon gaeve in groep 2 & 3 van De Springplank. Irst nog efkes mit Juf Riet en de jônges en maedjes van groep 1 ônger 't speulkwarteer boehte 'n denske/spelke gedaon. Prachtig um te zeen wat 'n vaer en unne mantel beteikent veur de allerklinste. Daonao mit 'n lekker tas koffie (waas nuëdig) in de kringk gezaete béj juf Ellen en de kinger van groep 2 & 3. Gezonge, gedanst, gepolonaisd en veural veul vraoge beantwoordt. Op 'n erg leuke maneer geprobeerd um de jeugd iets béj te bringe euver de carnaval. Waarsjienlik (en hopelik) 'n bietje indruk gemakt; auch in groep 4 waor we nog de polonaise hebbe gelaupe. 'n Bietje ochtendgymnastiek kôs gin kwaod nao de slopende resepsie, maar wae veulde ôs méj net 'n bietje Sinterklaos. Um 15. oohr wer truuk aanbeland in sjoël um getuuge te zien in de aula van de onthulling van de néje sjoëlraod en Prins en Prinses. Al snel kwaame de néje Raod mit Prins Wouter d'n 1e en Prinses Rian 1e oeht de koker rolle van presentratrice Juf "Dancing on ice" Ellen. De prinselikke versiersele moge umhange béj de néje sjoëlhiërsers en nao aaflaup hendjes gegaeve, gefotood en gepolonaisd. Ôngertusse nog wat jonge wég gejaagd die minde det miene mantel auch as tent gebroekt kos waere….en toen, rust……. wies volgende waek allemaol béj de bônkte aovende. We zeen ôs…… Brookhaas blief se hiel dien laeve, mit vastelaovend same, efkes alles gaeve!
4 fibberwarie 2007 00:00:00
Volges idderein dé groëte daag….en jao….weurd sjeete te kort; wat 'n fiëst um mit te moge make! Um 15 oor nog mit de familie 'n tas koffie gedronke béj ôs thoes; toch wel zenuwechtig; doe wits neet wasse mos verwachte. Stipt um 15.30 oor stông de ganse Brookhaze-femilie, incl. kammeraöj en traöters béj ôs veur de deur. Naodet José van Wendy 'n böske bloome mocht kriege in vol ornaat op nao de koeht veur de resepsie. Dan geit 't spel oppe waage; eigelik flitse d'r hiel veul dinge oeht dien laeve veurbéj. Sjoëne verhaole, gekke verhaole, domme verhaole, waore verhaole, verzonne verhaole, mer bovenal prachtige verhaole en enorm veul gezichte (mit verhaole…) die veurbéj kome um ôs veer te felicitere. Wat 'n minse allemaol; geweldig! Alle oëms, tantes, naeve en nichte, ôs mam, mien sjoënmooder, sjoënbreurs en zusters en anger femilie, de geveulige weurd van Sjonnie en de rest van de femilie Hermans en 't prachtige kado ("unne brok in de kael" en jao "ozze Peter"), de sjoën weurd van Willie names Wurt Niks en de ludieke kado's ("prachtige stretch-Tshirts"), de grandioze opkomst van de collega's van de Max (wies tot in 't Zuuje toe) mit daobéj de jeugdprinses oeht Haerle en 't jeugdprinske oeht Biëgde, de collega's van Ron ziene baas Franssen, alle vereiniginge, de OJB-Brookhaeskes mit Prins Luc & Prinses Anouk, de KBB mit Freek & Lynn, de serenaatjes van 't Strötje en fanfaar EMM, ozze pap ziene kammeraod Jan de Korte mit zien vrouw Tiny , dae efkes op en neer kumpt gereeje oeht Fryslân ("neet te geluive…"), Peter & Thea Grommen mit de oprechte weurd, de "Schenskens" van Jan & Corry, Prins Roy van d'n Hab oeht Bree, 't bezeuk van alle zustervereiniginge en de sjoën weurd van de vorste béj de resepsietaofel en van de Prinse daonao, en neet in de liste plaats de veule, veule, angere minse die ôs op persoënlikke titel kwaame felicitere; allemaol en idderein hiel, hiel hel bedankt!!! Um 18.45 oor sloot William en dan kriegse 't woord; ich woort d'r 'n bietje stil van…..maar béj vastelaovend huurt sjaele wazel en dus haeje Ron en ich bedach um de Brookhaze in 't kader van 't motto "Wae laote ôs verrasse" 'ns echt te verrasse mit d'n irste Kunningsluster opstaeker; asse ze dan 's aoves trots rôngk zuus laupe mit det dingk dan zuusse det 't auch letterlik en figuurlik unnen opstaeker is en det is auch zeker de bedoeling. Naodet de Hofkapel de zaal lekker opgewermd héj, kos Antonio 't daak d'r aaf laote gaon en jao…. 't daak ging d'r aaf. Wat 'n stumming en sfeer, gewoën unne kolkende zaal dae vol d'raan ging!; ich heb euch allemaol zeen geniete en det heb ich, en mit mich José, Ron en Wendy en de kids zeker auch gedaon. Super! Volges mich heb ich gezwit waor ich nog noeit gezwit heb, maar 't waas 't allemaol diek en dubbel waerd. Um 23 oor waas de piep en de zaal leeg, en jao…..dit waas zeker ein van de sjônste daag oeht ôs laeve. Unnen daag mit 't echte geveul van vastelaovend! BEDANKT ALLEMAOL! Brookhaas blief se hiel dien laeve, mit vastelaovend same, efkes alles gaeve!
3 fibberwarie 2007 00:00:00
"Nog efkes en dan zit alweer de linte in de lôch, dan ligge de jônge flotse weer te piëpe in d'n bôch……" zông oeits 'ns eemus in de stad. Ônger 'n fantastisch veurjaorszunke mit begeleiding van de Hofkapel en mussegefluit op nao "Savelberg" gegaon um dao Prinses Ellen 1e en de voltallige Raod 'n ôngersjeijing in de orde van de Brookhaze um te hange. Irst nog effe oeht motte wieke veur 'n paar gaasbranders (angers ware de néj vaere al drek te kort gewees…ha…ha….), daonao de alternatieve Brookhazekoeht in ônger de klanke van 't hoesorkés, de Breethaler. Same mit Prins Wiet en Ves van resp. Egchel en Beringe (die auch dao waare) de baenkes van de vloer laote gaon en um 17.00 oor wér truuk nao de koeht. Waas d'r al lang neet miër gewees, maar jammer det d'r zoe weinig bewoëners ware in verhaojing tot bezeukers. Toch unne sjoéne middig gehad; heerlik um te zeen wie oprecht ze dao zien in doon en laote. Idderein geniet van de vastelaovend op zien eige maneer, en det huërt zoë. Um 19.00 oohr same mit Pastoër van Tulder, de OJB & de KBB in de H. Mis de laevende en euverlaevende leeje van de Brookhaze bedach; 'n anger Mis dan normaal. Mien gedachte ginge wér truuk nao 3 waeke geleeje, mer auch nao 'n jaor iërder en de jaore daoveur… Ich hoop det de Brookhaze det neet mier mit hove te make in de toekôms. Net wie William bedoelde in 't slotwoord. Neet mekkelik, mer toch….Amen. 's Aoves op tiehd nao bed veur de groëte daag van merge. Brookhaas blief se hiel dien laeve, mit vastelaovend same, efkes alles gaeve!
2 fibberwarie 2007 00:00:00
Klaor veur 't irste volle weekend as Prins ziende; lekker 4 daag "aon de geng". Um 19 oor in de zaal um getuuge te zien van mien néje collegaatjes van de OJB en de KBB. Naodet we ônger de klanke van Hofkapel "The Happy Togethers" de good gevulde en gezellige koeht in mochte, begos de duo-onthulling al gauw onger leiding van Henny Vullings Huisman. Via unne geprojecteerde puzzle woorte de néj hoëghede op 't podium getoverd en dao stonge ze: Prins Luc 1e & Prinses Anouk 1e , adjudant Sander & broedegom Freek en bruudje Lynn. Mit unne "smile" oppe snoeht woort 't applaus en gejuich in ontvangst genome. Nao irst de kersverse en eur aojers gefeliciteerd te hebbe, mochte we wer d'rtegenaan; same mit Ajudant Ron en de raod en de jeugd knalle. Mer wat bleek….det is angers as vreuger; man, wat 'n denskes allemaol! De Prins wos zich méj ginne raod…..ich kos 't neet allemaol béj haoje; mer de jeugd liërt mich det danse nog wel mit die daag. Nog 'n "fris" röndje gedaon mit die jônges en maedjes en gehost wies aan de klok van elluf oor; op 't létst zelfs nog same bove op 't podium gesjoenkeld mit Prins Luc & Prinses Anouk en de rest van de jeugd. Tenslotte nog effe mit Heum en seitbaas Twan 'n ode aan de Sjenskesweeg gebrach mit Kartoesj zien "Veer höbbe de Prins in de sjtraot". Daonao nog efkes in de café wat gedronke mit de Raod en de rest. Maar….de eikes van Udo Koch Industries BV looge op ôs te wachte. 't Hoes aan de Prinsestraot waas te klein, maar 't waas errug gezellig en de eikes vloge de pan oeht wies kwart veur 4. Weltruste. Brookhaas blief se hiel dien laeve, mit vastelaovend same, efkes alles gaeve!
29 jannuwarie 2007 00:00:00
Veur de twidde waek op réj nao Kepél; dit kiër um Prins Roy en zien vrouw Oukje zelluf te felicitere. Veur 't irst same mit alle angere Prinse béjein. Supergezellig. Vanaaf 't einde van de resepsie volop "aon de geng" wies de bus d'r waar; zelfs aojerwets gepogood….. de middag kos wer neet lang genog deure en we moste wer veul te vreug nao hoes. Wer truuk béj Thijsse same mit alle angere roei jes, nog effe 'n polonaise gedaon op 't fiëst van Oma Van Berlo oeht Beringe, mien achter-achterfemilie. Same gefototood; sjoën asse zuus det zoe eemus op zônne wieze laeftiehd det erg kin waardere. Det is echt sjoën. Daonao nog effe wat geklasjeneerd in de café en nao 'n frietje van Peet naat en meug nao hoes gelaupe mit José & Linda. Brookhaas blief se hiel dien laeve, mit vastelaovend same, efkes alles gaeve!
28 jannuwarie 2007 00:00:00
Op zatterdig vréj; altiehd wer wénne veur de prins…. Um negen oohr stong ich béj de bekker ;de ketel "Servische boënesoep" waas daags d'rveur al klaor. Um 10 oohr de irste vréjwilligers van Wurt Niks aan de koffie gezat, maar al gauw mos d'r begos waere mit opbouwe same mit 't duo Heynen & Heynen van de CV. Otto kwaam mit de "kop" oppe wage aan gereeje ("ich weit zeker det DENK dao veul euver nao heet motte dinke/auch bedankt collega's en kammeraöj…) en de irste päol ginge al snel de grônk in. Det alles onger de klanke van L1; toch erg spannend um te loestere of de Hampelemen d'r hiel missjien toch béj zote…. de finale van 't LVK…..helaas…mer toch gruëts det Kunningslus in de halve finale stông en volgende kier missjien baeter. Auch Albert & Peggy ware inmiddels aangesjoove um te loestere en die verraste mich mit 'n prachtkado; kiepevel! Hardstikke bedankt! Auch sjoën det 't krioelde van de jeugd van Wurt Niks die de straot onveilig makde en "holp" waor nuddig waar. Rôngk ein oor stong en hong alles recht (auch de lempkes ware aan) en same mit idderein woort gezellig de inwendige mins versterkt. Boehte zoog 't d'r sjoën oeht. Adjudant Ron héj 't wirk d'r inmiddels auch op zitte en dus op nao de adjudantestraot um dao te versiere. Nao 'n eurke waas alles klaor en mit de meiste van Wurt Niks nog effe wat gedronke béj Ron & Wendy. Same nao P & M geloesterd. Um zes oohr mit Ron & Wullem nao Nellie en de kinger gewees en dao 'n tas koffie gedronke en same 't verdreet euver Cor gedeild. Brookhaas blief se hiel dien laeve, mit vastelaovend same, efkes alles gaeve!
21 jannuwarie 2007 00:00:00
Tillefoontjes, mailtjes, SMSjes, vanaaf smerges begint de film wer gewoën opnéj. Prachtig…. Ontbijtje gedaon mit Wullem Joeccius en nog efkes alles de revue laote passere. 's Middags irst nag efkes in vol ornaat nao Aaron, de zoon van adjudant Ron, um dae 'n hendje te gaeve mit ziene verjeurdig. Dan via Gromme op nao de Kuus in Kepél; dao "veur 't irst" kennis gemakt mit de meiste collega-prinse (jammer det neet idderein dao waas) en in unne sfeervol aangekleide mega-zaal rustig begonne aan de middig. Wie de resepsie aaf waas, begos Sjloehtingstiehd mit stumming make en al gauw steise bove oppe bühne. Auch det is wer hiël speciaal asse zuus desse contact haes mit de zaal en det de minse los beginne te kome. Gepolonaisd, gespronge, gezonge en alles wat nog miër kan; Ronnie waas wer unne supersteun en zorgde det 't neemus aan niks ontbrook. Um 19 oor kwaam Angelina optraeje en "de lempkes ginge inderdaad aan" ( Heb Hay Jeuken nog irst wille belle…ha, ha..). Laternao nog effe de microfoon vast moge haoje um te moge zinge mit Angelina en same mit de Brookhaze Kunningslus zeker van ozze biste kangk laote zeen aan 't aanwezige publiek. Nao aaflaup béj Gromme d'r nog 'n paar gedronke mit de "wieze" raod en same mit Wullem truuk gelaupe nao 't maedje. Mergenaovend foto's knippe en vergadere. Kin alwer neet wachte op de volgende waek…..we zeen os……! Prins Elluf 3e Brookhaas blief se hiel dien laeve, mit vastelaovend same, efkes alles gaeve!
20 jannuwarie 2007 00:00:00
Nao 'n erg bewogen waek mit de nuddige wandelinge mosse toch (wie moeilik soms auch) mit 'n positief geveul nao 't oehtgestelde prinsenbal toe laeve. Van alles sjuut d'r dich door de kop, mer 't mot veuroeht en de vastelaovend mot toch gaon beginne wie 't huurt; mit 't prinsebal. Euverdaag nog gewoën gewirkt, en 's aoves irst nao mam um te vertille wat d'r steit te gebeure. Naodet die nog net neet van de stool waas gevalle effe pinne béj de bank (en zelfs dao al beina "betrapt" waere door eemus) en dan allein op nao de zaal. In de koeht kwaam d'r aaf en toe wer 'ns eemus veurbéj dae zei det ich woort getipt, mer d'n dukste tiehd toch mit 'n staole gezich volhaoje desse die vaer auch dit jaor wer neet op kriegs. Sjoën um te zeen det 't druk waas en det d'r zoe veul jeugd waas. Det belooft wat veur de komende vastelaovend! Dan geit 't spel oppe wage; de emotionele weurd van William en auch de litste weurd van Prins Peter 2e zorge d'rveur desse wer 'n speld kins huëre valle in de zaal. Prins Peter 2e en adjudant Hans waere mit 't deepste respect bedankt en de onthulling moog eindelik beginne. De lasso's kwame de zaal in en as ein van de vief kandidate wurse nao bove gehald. Daonao geit 't snel; oad-buurman Robbie wurt de nepprins en ich mocht de wigwam in. Naodet Rob as indiaan get door de zaal héj gepatert, makde William bekind det 't um toch neet waar en det de néje hiërser in de wigwam zoot. De zaal ging mit aaftelle tot 10, allein William tilde tot Elluf en dan moogse dich laote zeen: EINDELIK….. Kiepevel asse 't gejuich oeht de zaal beloesters en nog miër kiepevel asse de reaksie van dien dochter in de zaal huurs, de mônk veel ope béj 't maedje. Dan moogse diene steun en toeverlaot adjudant Ron bekindmake en kome auch José en Wendy en de kids nao bove. Geweldig wie os jeugd reageert, os Sem waas zelfs zoë onger d'n indruk det ze d'r zeek van woort… Nao 't umhange van alle prinselikke dinger, wurt 't tiehd veur de proklamasie die se natuurlik afsloehts mit diene spreuk: Brookhaas blief se hiel dien laeve, mit vastelaovend same, efkes alles gaeve! Dan rap van de bühne aaf, veur de spontane resepsie. Dankjewel allemaol veur de fantastische reaksies. Vrimd mer daonao mosse effe diene weeg zeuke; mosse geliek veurop gaon of mosse effe nao dien familie, kammeraöj en bekinde haer? Toch maar gaas geave. Adjudant Ron bemeujde zich mit de femilie en bekinde en ich besloot dus um veurop te gaon. Langzaam mer zeker wakkert 't veur in de Brookhaze aan en kumpt de koeht los. Nog oppe sjouwers gezaete en veul mit gegalderd en de rest, oppe meziek van miene collega Antonio. Wat vluugt d'n tiehd en veur se 't wits is 't 3 oor. Thoes gekome nog effe nao Naer gebeld um mien naef te felicitere mit zien gewonne vaetje beer. Hae héj toch geliek…Ich en auch José ware bléj det de remme los mochte. Superzin in merge; dan nao 5 x 11 - Kepél veur 't irste optraeje boehte de landsgrenze…ha, ha… Brookhaas blief se hiel dien laeve, mit vastelaovend same, efkes alles gaeve!
   
© C.V. de Brookhaze | 2000 - 2018