Ut Motto vur 't seizoen 2018 - 2019 is:  
''Sjitterend

   

2006 Peter de twidde (Verhaegh)

20 jannuwarie 2007 00:00:00
Dan toch de daag aangebroke det ich mos aftraeje. In ein gezellige Brokkhazekoeht kwame wae nao binne same mèt de hofkapel en de dansmarietjes. Naodet vorst William ein woord euver Cor hej gezag, kos ich beginne aan miene litste speech as prins. Nao un aarzelend begin heb ich iers de vorst bedank, daonao noch mien familie en de faxclub en as litste Hans. n as allerlitste noch eine kier miene spreuk. Jonk en aod, groët of klein, mit vastelaovend drej daag bejein Ich wil noch uns idderein bedanke vur de ongersteuning die gae os gegaeve hebt nao zon bewoge jaor. Ich bin ondanks alles toch blei det ich prins waas, want ut is ein hiele beleving. Ich hoop dan auch det gae de neije prins op dezelfde wieze zult ongersteunen zoedet de Brookhaze, ondanks det Cor der nimmer bei is, eine sjoene vastelaovend 2007 hebbe. Alaaf Jonk en aod, groët of klein, vur altiehd bejein
19 jannuwarie 2007 00:00:00
Door ut overlieje van Cor hebbe ze Hans en mich gevraagt of wae nao de Grashook woeije gaon. Det hebbe wae dus gedaon. Vorst William mos natuurlik auch get zegge en det dej hae op ein gooije manier. Ich mot zegge det ich neet in ein "fiest"stumming waas. Wae hebbe de aovend op ein gooije en gepaste manier volbrach. Ich dink det ut wel goot is gewees um nao de Graasvraeters te gaon, desse toch mèt de vereiniging bejein bis gewees. Jonk en aod, groët of klein, mit vastelaovend drej daag bejein
14 jannuwarie 2007 00:00:00
's merges um 10 oohr geit de tillefoon. Will belt op det Cor Vaessen is euverleje. Dan dinkse, det zal toch neet waor zien, maar det is 't wel. Wat mosse hej op zegge? ..... Cor, bedankt veur die 13 jaor det ich same mèt dich bej de Brookhaze waas. Wae zulle dich misse. Jonk en aod, groët of klein, vur altiehd bejein
13 jannuwarie 2007 00:00:00
't P en M festival waas dit jaor in Kessel mit veur Kunningslus Drek. Ze moste as litste optreje. Dit is zeker gin naodeil. In ein bomvolle werme tent waor allerlei dampe honge, waas de sfeer wèr geweldig. Naodet ilf groepe ware gewees kwaam Kunningslus. Wae mèt zien alle veuraan staon um Drek op alle maniere te steune. Nao hun prachtig optreje moste wae effe wachte op de oehtslaag. Helaas veel Kunningslus neet in de prieze maar ik dink det wae zoeget de meiste fans mit heije gebrag. Later op den aovend waas der ein gastoptreje van Weej-Dreej. Die zorgde der veur det 't in de tent nog get wermer woort. Eine sjoene afsloehting van deze aovend. Jonk en aod, groët of klein, mit vastelaovend drej daag bejein
12 november 2006 00:00:00
Dit is de erste activiteit van 't neije seizoen. Altiehd eine sjoene middig/aovend. Zelf doot ich al veur de 4e kier mèt zinge mèt de groep Aafgelas. Dit jaor deeje der ein rekor aantal groepe mèt namelik 12. In de brookhazekoeht waas 't dan auch goot druk. Naodet idderein 2 kier gezonge hej kwaam de jurie tot de volgende oehtslaag. De prissentatiepries woort gewonne door kiët Krangs-Um die veur de erste kier mèt deeje. Dees kiët wist auch nog 3e te waere bej de gewoene oehtslaag. Op de 2e plaats dit jaor de Hampelemen en de winnaars van dit jaor waas Drek mit Ginne apres-ski. Dao waas ich hiel blei mit want dao zinge der sommige van de faxclub bej. Eine terechte winnaar. Daonao nog tot in de kleine eurkes doorgegaon. Jonk en aod, groët of klein, mit vastelaovend drej daag bejein
28 fibberwarie 2006 00:00:00
Alwèr un kort nachje want wae moste alles klaorzitte in de kantine umdet de raod en 't bestuur van de Brookhaze kwame aete. Ich hej eine brunch bestilt bei Tuts. Um 11 oohr kwame ze allemaol aete. De kantine waas net groët genog. 't waas lekker aete, det vonge zelfs de snoeiers. Nao 't opruume umtrikke en naor Gromme um bejein te kome veur de kingerboerebroelof. In optoch nao de Brookhazekoeth in de snieje. In de koeht aangekome begos de ceremonie van Vera en Tim die vanmiddig in 't onech ginge trouwe. Zoëas de litste jaore heije ze der ein leuk stukske van gemak mit as topper de einmaolige ceremoniemeister. Naodet prins Tommy en prinses Marthe Vera en Tim in 't onech heije verbonge begos de resepsie van de kingerboorebroelof. Toen alle minse ware gewees, en det ware dur veul, kos 't fies beginne. 't Woor eine gezellige, sjoëne middig/aovend. En dan kumt de tied det we motte beginne mit de aafsloehting. Mit de buutemars nao 't podium. Iers woorte de Brookhaeskes en 't kingerboorebroedspaar naor bove gerope. Toen krege Ger en Peet 2 ongersjeijinge. Eine extra umdet dit de 11e kier waas mèt Ger en Peet as oehtbaters. Toen Frank Ottenheijm dae 11 jaor lid waas van de raod van 11. Dit tilde auch veur Mark Bos. En Jo Joosten dea oehtsjeiht as penningmister. Frank en Inge, Mark en Jacqueline, Jo en Angela bedankt veur alles. Toen woort ozze pap naor bove gerope. Vorst William zie mit sjoëne en gepaste weurd wie de situatie waas en waas gewees. Ich hej de ier um pap te ongersjeije in de orde van de Brookhaze. Toen dej pap auch ein weurdje nao alle minse in zaal. Wie hé det dej is mit gin pen te besjrieve. Pap klasse Toen kreeg ich de proclamasie aangereikt die der sjitterend oehtzoog. En as litste kreeg ich de microfoon. Iers de hofkepel, DJ Antonio en DJ 11 bedankt. Daonao de raod van 11, bestuur en de maedjes van de Brookhaze. En eine van de raod heb ich extra bedankt nl Twan Joosten want de foto's en wat dan auch steit binne ein mum van tieht oppe seit. Toen vorst Wiliam bedankt. Veur de vorst waas 't natuurlik auch eine aparte ervaring maar same mèt William en os femilie zien wae der de gansetied oeht gekome. William bedankt. En dan de faxclub. Ze zien euveral mèt gewees en hebbe mich euveral in gesteund en det guft eine prins un goot geveul. Faxers bedankt. En toen pap, Will en Dorothe, Margo en Charles, Fred, Emiel en Linda, Derk, Rosan, Elly en Koen. Gae hebt altiehd 100% en mier achter mich gestaon en zeker nao de doëd van os mam . De beslissinge die ich mos neme ware daodoor ein stuk mekkelikker. Allemaol bedankt. En as litste miene adjudant Hans. Ich heb allein ein daverend applaus gevraogd van de zaal veur zonne adjudant. Hans bedankt veur alles. Naodet ich ge-eindigt waas mit miene spreuk en 't brookhazelied hej ich noch ein liedje aangevraogt van Wooden Chain mèt as titel 'n böske blome. Mam vong det ein sjoën nummer. Same mèt de femilie in eine kring hebbe wae dit waardig aafgeslote. 't is jammer det os mam neet veul heet moge mètmake van die daag, maar van die paar daag heet ze intens genote. Daonao noch door gegaon tot laat in den aovend tot idderein aan de pin waas inclusief ichzelf. Minse, ich wil noch eine kier idderein bedanke dae pap, de femilie en mich ongersteunt hebbe mit dees daag. Carnaval 2006 zal ich noeit mier vergete. Allemaol bedankt, auch names Hans Jonk en aod, groët of klein, mit vastelaovend drej daag bejein
27 fibberwarie 2006 00:00:00
's Merges wer vreug oeht de vaére want um 10 oohr moste wae de teikeninge van de kinger van de liegere sjoel bekieke um der ein paar winnaars oeht te hale. Det veel neet mèt want idderein duit zien bist mèt teikene. Maar Hans en ich zien der toch oehtgekome. Um 11 oohr heije wae 'n extraatje want wae ginge naor Frits en Leen Fleuren. Frits waas 11 jaor iere lid en umdet haé neet op de aafsloehting kos zien , zien waa naor de Zankstraot gegaon. Same mit Hans, vorst William, veurzitter Paul en Twan veur de pletjes. Frits waas hiel verierd det haé woort gehuldigd. Veur Leen heije wae ein böske blome. Daonao noch efkes naor de Brookhazekoeht um de kleurplate op te hange. Snel nao hoes um get te aete want um 1/2 3 moste wae wèr aanwezig zien veur 't roeieneuzebal. Clown Frodie zoe vreug kome maar door omstandigheeje woort 't hiel get later wat wel jammer waas. Maar aevegoot veul polonaises en dansjes gedaon mèt de kinger. En dan neet te vergete de optraejes van de dansmarietjes en de 2 showdansgroepe. Ich wil de maedjes en de begeleiding hiel hel bedanke. Eindelik waas 't zoewiet det clown Frodie begos mit zien optraeje. Is toch sjoën um te zeen wie de kinger aandachtig loestere en mèt doon zinge en danse same mit Frodie. De grotste verrassing waas det prins Djen 1 mèt de raod van 11 van de Windjbuujels oeht de Ruiver binnekwaam. Zelfs DJ Antonio wis der niks van aaf. Same mèt de Brookhaeskes eine hiele tied op 't podium gestaon. Dao kreeg ich ein ongersjeijing van prins Djen 1. Natuurlik kreeg hae der auch eine van de Brookhaze en Brookhaeskes. Naodet wae noch ein sjoën dansje gelierd heije ging prins Djen 1 mèt zien gevolg wèr naor de Ruiver. Wae zien toen effe gaon aete in de tamboer um get energie op te doon vur de aovend. Van de tamboer oeht naor de Poorter waor wae de rest van de aovend bleve. Hej waas 't neet stampvol maar wel wèr baeregezellig. Mit DJ 11 achter de drejtaofel hebbe wae der eine goije aovend van gemakt. Allein van zonne griekse dans wursse ech wel meug. En meug ware auch sommige angere (faxers). Det kan ich mich goot veurstille want 't zien lange daag. En nao unne haup polonaises en dergelikke is 't wèr 2 oohr. Toen mit un deil man eikes gewees aete bei mich. Wèr unne daag veurbei, det geit wel snel. Jonk en aod, groët of klein, mit vastelaovend drej daag bejein
26 fibberwarie 2006 00:00:00
Op zonnig is altied de optoch. Ich bin van te veure bei de wagebouwers gewees kieke wie ’t der allemaol oehtzoog. Mèt de krat beer die ich bei mich hej waas idderein blei. Ich mot zegge det de jonges en maedjes ieverig bezigwaare. Mèt wèrke hej ich auch al las van alles en idderein want ich moch nurges kieke en loestere waas auch al verboije. De optoch zelf waas natuurlik wer eine bonte stoet van groepe en wages. En ’t liekt det de kwaliteit ilk jaor béter wurd. Asse van de vorst huurs wievuul minse der mit hebbe gedaon, det is neet te geluive. Zelf moch ich same mit Hans en de vorst snuupkes en koekjes verdeile onger de toesjouwers. Bei de Brookhazekoeht aangekome kos ’t optochbal beginne. Det is veur mich altied de sjontste daag van de carnaval. Dit jaor waas ’t neet angers. In eine bomvolle koeht waas ’t beregezellig. Later op den aovend mèt de priesoehtreiking vong ich ’t sjitterend det personielsvereiniging Trosje Los gewonne hej bei de groepen. En de angere prins heet volges mich den daag van zien laeve gehat. Wat wulsse auch mit zon harem. Nao de priesoehtreiking ging ’t fies wer gewoen wier tot in de kleine eurkes. Alles bejein eine geweldige daag. Jonk en aod, groët of klein, mit vastelaovend drej daag bejein
25 fibberwarie 2006 00:00:00
Iers foto's make bei de Brookhazekoeht mèt 't bestuur en de raod en de dansmarietjes. Toen nao Kepél veur de machseuverdrach. Wae moste os mit alle zustervereinigingen opstille bei de Pit um onger begeleiding van de Graaskneuzers en 't Rebels Kepelke in eine lange stoet nao 't gemeintehoes te laupe. Dit jaor waas der eine angere opzit mit de machseuverdrach. Boete stong Ger Frenken os op te wachte en mochte pas as litste naor binne. In de raodszaal heije ze eine boksring gemak mit aan eine kant 't college en aan de angere kank de prinse en prinses. In ein vorm van kopspijkers moste wae probere de mach te kriege door 't spel te winne. Det lukte mekkelik al waas ich neet zo goot mèt de hamer. Ger Frenken deej 't super as presentator. Op 't eind krege alle prinse de mach euver dees daag in de vorm van eine sleutel en ein medaille. Daonao noch efkes bejeinzien onger 't genot van 'n drenkske. Tot slot noch alle prinse eine geweldige vastelaovend toegewinst veurdet wae nao hoes moste. Jonk en aod, groët of klein, mit vastelaovend drej daag bejein
25 fibberwarie 2006 00:00:00
Zoeas de litste jaore op zatterdigaovend nao de Poorter veur de boëtegewoene binnezitting Dit jaor deje alle artieste mèt die op de liedjesmiddig mit heije gedaon. Altiehd eine gezellige aovend mit ein mix van live-optraejes en meziek van DJ 11. Op deze aovend moch ich mèt aafgelas as litste optraeje. Tussedoor krege Thea en Peter ein ongersjeiing in de orde van de Brookhaze en veur Thea ein böske blome. Op deze aovend wurd auch altied de top 11 van 11 gedreijd. De faxclub heet der veur gezorgt det dit jaor Beppie Kraft op 1 stong mit "ich heb gedruimt vannach". Auch deze aovend vloog de tiehd veurbei en waas 't wer 2 oohr gewees. Daonao traditiegetrouw naor de vorst gewees um lekkere bölkes in tomatesaus te aete en ein tas koffie te drinke. Jonk en aod, groët of klein, mit vastelaovend drej daag bejein
24 fibberwarie 2006 00:00:00
Ich wil, auch names Pap en de rest van de femilie Verhaegh, idderein bedanke die, op wilke maneer dan auch, mètgeleeft en os ongersteund hebbe bej ut oeverleide van os Mam. Asse zuús waorse euveral reaksies van haes gekrege: neet te geluive . Det is veur os auch ein ruggesteun in deze moeilikke tied. Wae hebbe Mam ein waardig aafsjied kinne geve en dao hebbe wae 'n good geveul aan overgehaoje. Idderein bedankt
24 fibberwarie 2006 00:00:00
's Merges vreug al optieht nao de creche same mit adjudant Hans, Twan en Frank S. Toen wae binnekwame waas 't geliek stil. Det duurde neet lang want as der eine begint te praote volge der vanzelf miër. Ich moch sjieps oethdeile aan alle kinger en zelf krege wae koffie mèt ein stuk cake. Naodet de kinger 't drinke wat ze gekrege heije op waas begoste wae mèt polonaises op de carnavalsmeziek. Hans en ich krege nog ein meziekblik woe we same mèt de kinger herrie mit makte. Tussedoor woorte der noch foto's gemak van alle kinger apart same mèt de prins en adjudant. Um 11 oor moste wae wer jammergenog wier, maar wae hebbe os good geamuseerd. Van dao oeht nao de liegere sjoel want wae mochte mitlaupe in de sjoeloptoch. Iers effe bei de liegste groepe binnegelaupe. Dao kinsse merke det die get mondiger zien en zich neet versjrikke. Daonao de optoch gelaupe door de Brookhaze-city agter't prinselik paar van de liegere sjoel prins Daan, prinses Sem en adjudant Rik. Ich mot zegge det ze der ein goot tempo in heije. Sommige kinger heije de bolderker versiert, eine angere de skelter. Ut zoog der leuk oeht. 's Middes waas de sjoelzitting in de Brookhazekoeht. Alle prinse en prinsesse mochte plaatsneme op eine stool mit got oethzich op 't podium. Ze heije wer ein vol programma mit onger angere de dansmarietjes en showdansgroep 1. 't is toch prachtig um te zeen wiegoot idderein zien bist duit op wilke manier dan auch. Op 't einde woorte wae op 't podium geroope en mos ich effe ein weurdje doon. Daonao krege alle kinger ein medaille en sjieps en drinke. Toen waas der noch ein optraeje van de Hampelemen en daonao hebbe we diverse polonaises, dansjes etc gemak mèt as deejay DJ Antonio. Wae hebbe 't neet al te laat kinne make want 's aoves noch ein verplichting. Jonk en aod, groët of klein, mit vastelaovend drej daag bejein
24 fibberwarie 2006 00:00:00
De primeur, veur de erste kier heet de OJB ein resepsie veur 't prinsepaar. Dit is eine goije zit want zoë steit 't prinsepaar van de OJB auch in de picture. De Brookhazekoeht waas goot vol toen wae prins Tommy 1, prinses Marthe 1 en adjudant Bas ginge feliciteren. Vorst William dej ein weurdje en Hans en ich hebbe 't prinselik trio ein aetentje aangeboje bei MC Donalds. Nao de reseptie hebbe wae der same eine keigezellige aovend van gemakt, same mit alle Brookhaze en Brookhaeskes. Alles bejein eine hiele sjoëne daag. Jonk en aod, groët of klein, mit vastelaovend drej daag bejein
21 fibberwarie 2006 00:00:00
Ich probeer de draod wer op te pakke, te beginne mit de zittinge bei de Wietel. Dit jaor ware de Brookhaze aan de beurt um hej aanwezig te zien en um eemus te huldige. Dit ware Thei en Miet Verhaegh Lormans, wat veur heur ein grote verrassing waas. De aovend woort aaneingepraot door Joep Verbugt. Der ware optraejes van de dansmarietjes van de Brookhaze, de aod prinse van Dörp, K3, de Salvera's, de femilie Kempen, de Bretelboys, blaoskepel 't Strôtje en neet te vergaete Maud en Cynthia mèt 2 liedjes. Alles bejein eine sjoëne aovend mèt Miet en Thei as blej echpaar en ich blei det ich 'n bietje op de achtergronk kos blieve. Jonk en aod, groët of klein, mit vastelaovend drej daag bejein
19 fibberwarie 2006 00:00:00
Bonte aovende en resepsie Dörper Kuus Ich heb gehuurd det de bonte aovende good geslaagt zien ondanks de omstandighede. Det vinge wae as femilie toch sjoën want ut laeve get aevegood door. De resepsie van de Dörper Kuus is bezôg door ein delegasie van ut bestuur
14 fibberwarie 2006 00:00:00
's Morges amper op ut werk, kwaam bej mig ut droevige bericht door (via Prins Peter2) van ut euverleide van de mooder van Prins Peter2 Nel Verhaegh-Gommans Ondanks eur kritieke toestand van de lètste paar daag kwaam dit bericht aan as unne mookerslaag Allerirst gaon mien condoleances oeht nao Prins Peter2 en zien ganse femilie, verder nao idderein dae Nel ein werm hert toedroog. Veul vraoge koome op zo'n moment nao bove, wie en waarum haet dit kinne gebeure ? Vraoge, die noeist beantwoord zalle waere. En wie now wier ? Ein vraog die allein beantwoord kin waere door Prins Peter2 en zien femilie, woebej eur woort ten alle tieje gerespecteert zal waere. Thei, Prins Peter2 en de ganse femilie Verhaegh, hiel veul sterkte gewinst mèt dit ondraaglikke verlees van ug dierbare vrouw, mooder en oma.
12 fibberwarie 2006 00:00:00
Ich heb beslote um de reseptie toch door te laote gaon umdet de toestand van os mam stabiel waas, umdet de famielie achter mich stong watvuur beslissing ich auch zoe neme en umdet ich zeker weit det os mam zoe wille det de reseptie doorging. 's Middigs um 1/2 veer toen de al famielie bej os waas kwame ze mich ophale onger de muzikale klanke van de hofkapel. De bel ging en ozze pap waas mich veur en makte de deur oope en dao stong vorst William, adjudant Hans en Coby die mich ein bôske bloome aanbooj. Boëte stong de ganse karnavalsvereiniging mit aanhang, de OJB mit prins Tommy, prinses Marthe, adjudant Bas en de raod van ilf, 't kingerboorebroedspaar, de dansmarietjes en neet te vergete de faxclub. In optoch ginge wae nao de brookhazekoeht waor ich noch ff kos relexe. Bej de eupening van de reseptie heet vorst William ff gezag wie de toestand van os mam waas. En toen kwame de minse, minse en noch us minse. Ich weit neet wievuul hendjes Hans en ich hebbe gegaeve, dao kwaam beina gin eind aan. Sommige minse heije iets te zegge zoëas de kingerboorebroelof, de OJB, de fanfare, de famielie van Hans, de gemeinte, de taofeltennisclub, de zustervereinigingen en de faxclub. As einde van de resepsie mos ich ein weurdje doon wat kort en krachtig waas mit miene spreuk as aafsloehting. Daonao kos 't fiës beginne onger de klanke van de hofkapel en later dj Antonio. Der ware natuurlik auch moeilikke momente bej maar wae hebbe toch genote van deze daag. Daarum wil ich idderein bedanke, dae op wilke manier dan auch, mit heet gedrage aan deze geweldige middig/aovend. Natuurlik auch names Hans. Jonk en aod, groët of klein, mit vastelaovend drej daag bejein
11 fibberwarie 2006 00:00:00
Nao ein kort nachje slaope vanwege de toestand van os mam waas der zaterdigmerge iers overleg tussen de famielie, adjudant en de vorst hoe 't verder mos. Toen heb ich beslote um neet nao de Oelewappers te gaon want dao stong miene kop neet naor. Ich huurde van miene adjudant det ut wel ein sjoëne en werme resepsie waas. 's Aoves wel nao de Heilige Mis gewees wat nauw veur os zeker belangriehk waas. Daonao noch ff nao de faxkantine en nao eine verjeurdaag. Jonk en aod, groët of klein, mit vastelaovend drej daag bejein
10 fibberwarie 2006 00:00:00
Dit waas de erste kier det ich mos aantreje nao 't ongeluk van os mam. Dit waas dus duk vertille aan de minse wie 't waas mit mam want idderein makte zich zorge. 't oehtkome van 't OJB prinsepaar en de kingerboorebroelof waas veur de erste kier in de brookhazekoeht. As erste waas de onthulling van de kingerboorebroelof. Ze heije 3 van die big bags op 't podium staon waoronger iers 't bruutje onger verstopt waas. Dit bleek Vera Kempen te zien. Hejnao waas de broedegom aan de beurt. Dit ging op dezelfde wieze en oehteindelik kwam Tim Lormans te veursjien as broedegom. Daonao waas de beurt aan de OJB. Iers moste prins Bram, prinses Ellen en adjudant Bas aaftraeje. Toen woort ut podium verbouwt as inboorlingen die in groete potte aan 't koke ware en die in de zaal ronk keke of der niks lekkers tusse zoot. Nao ein paar minute kwame dao inins te veursjien Tommy Janssen en Marthe Schreurs as prins Tommy1 en prinses Marthe1. As adjudant hebbe ze Bas Lemmen. Nao det ze de erste weurt tot de Brookhaze en Brookhaeskes heije gerich, woort der iers ein resepsie gehaoje samen mit ut kingerboorebroelofspaar. Toen barste 't fiëst los en waas 't eine dolle boel in de Brookhazekoeht. Mit angere weurd: alwèr eine geweldige aovend. Jonk en aod, groët of klein, mit vastelaovend drej daag bejein
5 fibberwarie 2006 00:00:00
In 't rustigste wiekend wat resepties e.d. aangeit waas der allein op zonnig de resepsie van de Kepélse Kuus. Aangezeen ze dao 't cutureel centrum hebbe aafgebroke woort de resepsie gehaoje in 't aoje gemeintelager. Dit hej de Kepélse Kuus op ein geweldige wieze umgetoverd tot de Kuuzetempel. Wae ware as erste zustervereiniging aanwezig. Vorst William, zonger verspraeking, zei in zien weurdje iets euver prins Martijn 1 zien hobbies en euver eine dinkbieldige hônk. Hejnao kreeg ich ein ongersjeijing van prins Martijn 1. Daonao gewach en geloesterd nao de angere zustervereinigingen. Tot 't tiedstip det prins Martijn zien dankweurdje deej en kos 't fiës beginne. Op ein kleinigheidje nao in 't begin ( ginne meziek ) ginge wae der mit zien alle wer flink tegenaan mit aaf en toe ein kleine pauze tussendoor. Auch deze middig/aovend waas zoë veurbej en waas grandioos. De komende daag mot de snot nog oeht de kop um hielemaol fit te zien veur 't komend wiekend. Adjudant Hans haet der auch last van. Jonk en aod, groët of klein, mit vastelaovend drej daag bejein
28 jannuwarie 2006 00:00:00
Nao ein korte nachrus en ein lekker ontbijtje mit veul koffie kwame ze bej mich en Hans versiere. De ganse faxclub waas aanwezig en noch inkele van GONA en de Brookhaze. Nao veul bore, hamere, zage, binge en 't nuddige dinkwerk mot ich zegge det 't resultaat der auch moog zien. In ein woord "GRANDIOOS". Idderein dae hej aan heet mètgewirkt alvast bedankt daoveur. Hejnao bin ich ff nao mien teamgenoten van 't tafeltennisse gewees kieke en toen noch nao de kantine van de voetbalklub veur ein bespreking. Toen thoes get aete en klaormake veur de resepsie van de Kemphaze Jonk en aod, groët of klein, mit vastelaovend drej daag bejein
28 jannuwarie 2006 00:00:00
Mèt wèr ein ganse bus vol ginge waa nao de Kemphaze vur de resepsie van prins Paul 1 en Petra en Jeugdprins Guido en Jeugdprinses Annick. Nao det vorst William zien woord hej gedaon names de Brookhaze kreeg ich van prins Paul ein ongerscheijing. Nao 't felicitere hei ich efkes tied um rustig ein glas beer te drinke en get te kletse. Toen begos 't fiëst mèt de eine nao de angere polonaise en veurdesse 't wits is 't tied um nao hoes te gaon. Auch dit waas ein geweldige resepsie woe wae van genote hebbe Jonk en aod, groët of klein, mit vastelaovend drej daag bejein
27 jannuwarie 2006 00:00:00
Nao donderdig ierst ein intervieuw gehaoje te hebbe bej P&M radio kwaam de irste resepsie der al aan. Det is al jaore bej de Graasvraeters in Graashook. Dit jaor mit ein ganse bus vol want der ginge der van de familie en van de faxclub mèt. Nao lang wachte in de rei ware wae eindelik aan de beurt. Vorst William dej ierst zien weurtje en daonao kreeg ich mien irste ongersjeiing van Prins André van de Graasvraeters. Nao 't felisietere mosten wae noch effe wachte vurdet 't fiëst kos losbarste. Toen 't fiest einmaol bezig waas, ging 't allemaol zo snel det de aovend zoë vurbei waas. Allein veur naor de wc te gaon hej ich noch net tied tussen alle polonaises. Al mit al ein sjoën begin van de resepsies van de zustervereinigingen Jonk en aod, groët of klein, mit vastelaovend drej daag bejein
22 jannuwarie 2006 00:00:00
Eindelik waas 't zowiet, 't waas wel ein veurdeil det ich in de raod van 11 zoot, det schilde volges mich vuul veur de zenuwe. Naodet Prins Danny 1 en adjudant Peter ware aafgetreje begos de onthulling. Kwaam der eine mins verkleid as Abraham nao binnen (Wiel nog bedankt) Dae ging bove nao 't podium naeve vorst William staon. Toen begos ozze vorst Abraham van allerlei vraoge te stille. En de minse in de koeth die zoogse dinke nao ilke vraog en daorop 't goije antwoord. Det is wel ein sjoen moment asse zelf tusse de minse steis as nieje prins. De vraog van de vorst hoelang besteit de taofeltennisvereiniging waas de erste die 'n bietje mien richting op ging. Toen vorst William aan Abraham vraog weem dit voetbaljaor 350 widstrieje gevoetbalt hej bei Gona 1 goof de Abraham zelf 't verlossende antwoord det ich de neije prins van de Brookhaze waas. Bove op ut podium mos ich natuurlijk iers miene adjudant bekint make en det is Hans Hermans. Naodet wea os 'n bietje heije umgetrokke woort de rest van 't prinse en adjudantenkostuum door de dansmarietjes aangegeave. Toen krege wae unne bos bloome van de carnavalsvereiniging en daonao kos ich de proklamasie veurleze. Ich mot zegge det mich det 100% mèt veel. Toen koste we naor onger bej de minse in de zaal en krege we van de ganse zaal felicitaties. Nao deze "reseptie" begos 't fiest same mit dj Antonio en de hofkapel. En ich mot zegge det de tied dan nog sneller geit want veur desse 't in de gate hees is de aovend veurbej. Maar det is auch ein teiken det 't eine goije aovend is geweest. Ich wil idderein bedanke, auch namens Hans, die aafgelaupe zondaag in de Brookhazekoeht ware en die veur de sjitterende aovend gezorgt hebbe. En ich wil idderein oehtnuddige veur mien resepsie op zondaag 12 fibbruwarie van 4 tot 6 oohr in de Brookhazekoeht. Dan eindig ich mit miene spreuk: Jonk en aod, groët of klein, mit vastelaovend drej daag bejein
   
© C.V. de Brookhaze | 2000 - 2018